Novas Aristanesas, mèrcuris 25 de cabudanni de su 2024
Is olimpiònicos aristanesos addòbiant a su Presidente Mattarella – Addòbiu ispetziale, in Roma, pro is olimpiònicos aristanesos Alessia Orro, Stefano Oppo e Lorenzo Patta, chi ddos at retzidos su Presidente de sa repùblica, Sergio Mattarella. Sa prima càrriga de s’Istadu at retzidu a is medalliados olìmpicos e paralìmpicos chi ant pigadu parte a is giogos de Parigi 2024. Pro sa prima borta, ocannu ddoe fiant fintzas is atletas italianas/os chi si sunt classificados in su de bator postos.
Sa tzerimònia cun sa torrada de is banderas chi is italianos ant portadu a Parigi est cumentzada cun s’innu natzionale e cun sa projetzione de unu vìdeu intituladu “Parigi 2024”, cuncordadu dae Rai Sport. A pustis de su vìdeu ant faeddadu su presidente de su Coni Giovanni Malagò e su presidente de su Cumitadu Italianu Paralìmpicu Luca Pancalli.
Is portabanderas de s’iscuadra olìmpica, Arianna Errigo e Gianmarco Tamberi, paris cun s’alfiera de s’iscuadra paralìmpica, Ambra Sabatini, ant torradu a su Presidente Mattarella is fascas a tres colores firmadas dae is atletas chi ant bintu is medàllias in Parigi. A is atletas presentes su Presidente Mattarella ddis at donadu, in fines, un’àtera medàllia pro regordu.
Su medallieri de Parigi incungiadu dae is atletas aristanesos ddu formant sa medàllia de oro binta dae Alessia Orro, narabuiesa, chi cun s’iscuadra de pallavolo feminile est intrada in s’istòria de sa pallavolo italiana pro èssere istada sa prima iscuadra asula chi at bintu una triva olìmpica. Istòrica sa medàllia de prata binta dae Stefano Oppo, su canoteri aristanesu chi at fatu a trivas in Vaires-sur-Marne in sa finale de is pesos lèbios addopiados, paris cun su cumpàngiu de echipàgiu Gabriel Soares. Nudda medàllia, ma su de bator postos bellu pro Lorenzo Patta cun sa 4×100, a 7 tzentèsimos isceti dae sa medàllia de brunzu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
