Novas Aristanesas, chenàbura 19 de ghennàrgiu de su 2024
Sa limba biaita – Faghent a tìmere, sos nùmeros chi benint dae sa Asl in contu de s’isparghidura de sa Limba biaita in sa provìntzia de Aristanis: s’ùrtimu agiornamentu de su bulletinu de su mese de santandria 2023 in sas dies coladas at dadu a ischire chi su bestiàmene malàidu e mortu est crèschidu meda. Si ocannu passadu sos pegos malàidos fiant ebbia 876 in totu s’Aristanesu, cun 292 pegos mortos e 59 allevamentos leados dae sa maladia, in sos ùrtimos meses de su 2023 e a incomintzu de su 2024 sos pegos malàidos registrados sunt istados sa bellesa de 4.129 e sos pegos mortos 2.163, cun 123 allevamentos interessados dae sa maladia.
Sa maladia l’ant agatada in sos comunes de Arborea, Baullau, Crabas, Cùglieri, Gonnostramatza, Marrùbiu, Masuddas, Milis, Mòguru, Narabuìa, Nurachi, Ollasta, Aristanis, Arriora, Arcidanu, Santeru, Sèdilo, Sèneghe, Sipicia, Simaghis, Sabarussa, Terraba, Tramatza, Tresnuraghes, Uras, Tzeddiani, Zrofoliu.
A su chi narat sa Asl 5, su sierotipu chi s’est ispartu de prus est su 8, essidu a campu pro sa prima borta in Itàlia in un’allevamentu de Santeru. Sigomente sos pegos sunt pagu immunizados, su virus s’est ispartu meda. In un’allevamentu de Sèdilo sas cosas sunt andadas prus bene, ca su bestiàmene est immune a su sierotipu chi si b’est ispartu, su 4, ca aiat tentu cuntatos in antis e ca est vatzinadu.
Nointames sos dannos, sa Asl 5 de Aristanis dat seguràntzia pro su chi est capitende.
“Sos nùmeros de sos contàgios sunt bassos contra a sas epidemias passadas”, at ispiegadu Enrico Vacca, diretore de su Servìtziu de Sanidade animale de sa Asl 5. “Mancu male como su virus est dende borta. Una situatzione agiuada finas dae su clima de sas ùrtimas chidas e dae àteros fatore ecològicos, chi mìnimant s’atividade de su vetore de su virus, chi est su muschitu de su gènere culicoides”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
