Sa coa de chida in provìntzia de Aristanis – Faghende a trivas cun sa temporada chi si previdit in sa coa de chida, sunt medas is addòbios in programma in is biddas de sa provìntzia pro sàbadu 6 e domìnigu 7 de ghennàrgiu. Traditziones, Befanas, bonucoro e sentidu de comunidade ant a èssere is protagonistas de custas duas dies.
Cumentzende dae Aristanis, sa Befana at a arribare a pratza de Tzitade e nd’at a calare dae su palàtziu de is Corrias paris cun is Vìgiles de su Fogu. A merie si-nche at a bolare a su Tzentru cummertziale Porta Noa pro donare durches e àteras sorpresas, ma nudda carbone.
In Sabarussa, imbetzes, is donos ddos ant a portare is agiudantes a mototzicleta de sa Betzitedda: in ocasione de sa Motobefana de sàbadu, is mototziclistas sabarussesos ant a donare unu pagheddu de presu a is pipios de sa bidda de sa Badde Bassa de su Tirsu.
Cras in Putzu Idu torrant a cuncordare sa “Befana arribat … currende”, una caminada de bonucoro fata in cumpangia. Sa tarea at a èssere a lòmpere a sa comunidade-acasàgiu de bia de Evaristo Madeddu: inoghe is Befanas-caminadoras ant a donare is caramellas a is òspites, alligrende su logu.
In Cùglieri cras at a acabbare sa rassigna de addòbios de Paschighedda cun un’isfilada bella, cun giogos e àteros istentos pro totu sa comunidade. In Ollasta s’at a pòdere torrare a bìere su Naschimentu impersonadu dae òmines, fèminas e pipios beros, chi at a permìtere de iscobèrrere artes e fainas de sa Sardigna de su connotu.
In Arborea ddoe at a àere unu furrungone de traditziones vèneta cun “Brusa la Vecia”, su foghilone chi at a batire bonasorte a sa comunidade de sa tzitade de sa Bonìfica. A patera de fogu, s’at a pòdere bufare unu tzicheddu de binu in cumpangia, saludende s’annu nou.
A pustis de unu sàbadu de festa e de unu muntone de mìgias prenas de durches, domìnigu 7 s’at a pòdere pigare parte a su primu caminu de ocannu de sa Diòtzesi de Aristanis. Cun s’idea de “Respirare bellesa”, s’ant a pòdere iscobèrrere is prendas e is sartos bellos de duas biddas: Bonàrcadu e Paulle.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
