Novas dae sa sanidade in provìntzia de Aristanis – A primìtzius de s’annu nou puru sa de sa sanidade sighit a èssere una chistione chi ponet pistighìngiu in provìntzia de Aristanis: intra de mèigos chi si-nche andant in pensione (e non ddos remplasant!), àteros istorbos in is servìtzios, assignatziones de incàrrigos noos, sunt medas is novas chi nde sunt essidas a campu in custas primas chidas de su 2024.
Su problema betzu de is mèigos de base chi sunt tropu pagos amegant de ddu connòschere, immoe, 20 biddas de Marmidda e de Parte Montis. Cun s’andada in pensione de una dotora, chi si-nde incuraiat de is ambulatòrios de Gonnostramatza, Gonnonò, Sìmaba, Pompu e Masuddas, 1550 tzitadinos sunt abarrados sena de assistèntzia sanitària de base e ant a dèpere chircare is Ambulatòrios istraordinàrios territoriales.
In Aristanis, Santa Justa e Prammas is cosas, invècias, sunt megioradas, pro ite ca a pustis de meses de pagu seguresa, cando s’ambulatòriu de assistèntzia aiat serradu in deretura, sa Asl 5 de Aristanis nch’est renèssida a dare s’incàrrigu a un’àteru mèigu. In custa manera s’ant a pòdere assegurare duas aberturas in sa chida.
Fintzas is malàidos chi sunt abarrados sena de dotore in deghe biddas de Pianàlgia e Monteferru podent torrare a tènnere s’assistèntzia de base: su mèigu chi traballat in cussa zona podet sighire, difatis, a àteras 250 persones.
Sa chèscia, però, sighit pro unos cantos problemas chi ancoras non ddis ant agatadu remèdiu. A sa mesa de sa Regione ddoe est lòmpida pagas dies a oe sa chistione de is bìsitas oncològicas annuddadas in s’ispidale de Santu Martinu. Su consigieri regionale de su Movimentu de is Chimbe Isteddos Alessandro Solinas nd’at pesadu sa chistione, regordende-nde fintzas un’àtera: s’ismèngua de is letos in su repartu de Meighina.
E, in su 2024, sighit un’àteru problema betzu: su ritardu in sa cunsigna de is pannos pro is disàbiles. A pustis de meses de chèscia e de signalatziones, s’ùrtima est arribada dae una famìllia de Arriora, in ue ddoe est una antziana de 96 annos oramai arrimada in su letu e chi est abetende is pannos dae unu mese. A pustis de custa nova, àteras famìllias meda si sunt chesciadas pro su pròpiu istorbu in custu servìtziu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
