Is crèsias romànicas de sa provìntzia e is truncos de pedra de mola digitales – Is crèsias romànicas de sa provìntzia s’ant a pòdere connòschere mègius gràtzias a su telefoneddu: custu est su progetu de sa Fundatzione Sardigna Ìsula de su Romànicu pro pòdere gosare mègius de is prendas de sa fide ispartas peri is is biddas de sa provìntzia de Aristanis.
Paris cun una filera longa de àteros fràigos religiosos de sa Sardigna, is crèsias aristanesas puru ant a acasagiare truncos de pedra in ue ddoe est pintadu unu còdighe QR chi, cun un’iscansione fata cun su telefoneddu, at a iscoviare luegos totu is informos, is piessignos cuados, s’istòria e is segretos de cussu logu ispantosu.
Sunt unas binti is crèsias in ue ddoe ant a pònnere custos còdighes annoadores: in is meses imbenientes s’ant a pòdere agatare in sa Basìlica de Santa Justa, in sa crèsia de Santu Lenardu de Siete Fuentes in Santu Lussurzu, in sa crèsia de Santu Lenardu de Masuddas e in cussa de Santu Giuanni de Tramatza.
Ma ddos ant a cuncordare fintzas in sa cresiedda de Santu Marcu de Ollasta, in Santa Maria de Bonàrcadu, in Santu Giuanni de Sinis in Crabas e in Santa Crara de Aristanis. E, ancoras, in sa crèsia de Santu Lussurzu de Fordongianus, in sa crèsia de Santu Prameri de Ilartzi, in s’Oratòriu de is Ànimas de Màssama, in sa crèsia de Santu Pedru de Tzuri e in cussa dedicada a Santu Pedru Extra muros de Bosa.
Su progetu pensadu dae sa Fundatzione Sardigna Ìsula de su Romànicu, ghiada dae Antonello Figus, dd’at cuncordadu s’artesanu Walter Pinna, chi si nd’est incuradu de pònnere is còdighes QR in is truncos de pedra de mola niedda.
“Custos truncos de pedra mòlina cun is còdighes QR ant a permìtere a is bisitadores de iscobèrrere ònnia crèsia romànica de sa Sardigna”, at naradu su presidente de sa Fundatzione Antonello Figus, “a intro de s’acabbu de su beranu pensamus de àere cuncordadu totu is truncos de pedra de mola, mentras sa pàgina Internet est giai aberta e si ddoe agatant totu is informos utilosos pro is turistas: ònnia bisitadore, difatis, at a pòdere crèschere is connoschèntzias suas in contu de su Romànicu in Sardigna cun s’agiudu de su telefoneddu, chi permitit de portare in manos totu su materiale de informu carrigadu in sa retza. In is meses imbenientes amus a furriare totu in inglesu e in is àteras limbas europeas”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
