Sa mustra “Aurum Urens” – Dae su fogu mannu chi in s’istadiale de su 2021 aiat destruidu su Monteferru e sa Planàrgia a s’arte, sinnu de nàschida noa, in una mustra chi si podet bisitare in Aristanis, in is salas de su Museu Diotzesanu Arborensu, in pratza de sa Sea. “Aurum Urens” ponet paris fotografias e isculturas de s’artista aristanesu Michele Ardu, disterradu in Londra dae unos deghe annos, chi però in custos ùrtimos annos s’est torradu a acostare a sa Sardigna sua.
In is meses passados sa mustra aiat abertu in is Magasinos de su sale de Siena. Immoe s’abertura in Aristanis.
In sa mustra si ddoe podet bìere su chi abarrat de is olias brusiadas in Cùglieri, cantos de linna innieddigada dae sa passada de su fogu, ma fintzas àteros cantos de linna pulida e indorada. “Aurum Urens” giogat isfrutende sa diferèntzia intra de s’oro, sinnu de vida noa, e su chinisu, chi imbetzes regordat su destruimentu. A un’ala sa vida, a s’àtera sa morte. Sa punna de Michele Ardu est sa de faghere meledare a is bisitadores in contu de s’importu de s’ambiente e de su respetu suo.
Sa mustra “Aurum Urens” dda patrotzinant sa Regione Sardigna, su Corpus Forestale e s’assòtziu culturale Oristano e Oltre. Si podet bisitare su mèrcuris, dae is deghe de mangianu a sa una, e dae sa giòbia a su domìnigu, dae is deghe de mangianu a sa una e, a merie, dae is chimbe a is oto.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
