Sa provìntzia de Aristanis a coro ruju-biaitu – S’amore pro su Casteddu Fùbalu fintzas in sa provìntzia de Aristanis est semper prus sentidu, cun fainas meda dedicadas a sos rujos-biaitos in comunes meda de su territòriu. Si partit dae Nurachi, in ue su mese passadu su Casteddu Fan Club est istadu intituladu a Pepinu Lochi, de sa bidda e tifosu mannu de su Casteddu, mortu tres annos como pròpiu sa die chi sa sotziedade ruju-biaitu festaiat sos 100 annos dae sa fundatzione. In s’inauguratzione de sa sede de su Club, in su salone parrochiale in pratza de Crèsia, bi fiant fintzas duos giogadores ruju-biaitu Jakub Jankto e Adam Obert, acumpangiados dae su vitze-presidente de su Casteddu Fan Club, Stefano Pili.
Non solu, fintzas in Gonnoscodina b’at a àere unu Club nou: est in programma pro custu merie in su salone parrochiale, s’inauguratzione de su Casteddu Fan Club Gonnoscodina Ruju-biaitu nou “Radja Nainggolan”, intituladu a su tzentru-campista de Bèlgiu chi oe giogat in Indonèsia, in su Bhayangkara. Pro s’ocasione at a èssere presente fintzas una delegatzione de su Casteddu Fùbalu, cumposta dae giogadores e dirigentes.
E a pustis b’est Sorradile chi su 27 de ghennàrgiu coladu, at intituladu a Gigi Riva su lagu Omodeo e at postu in s’arburada, in su belvedere, una fotografia de su campione mannu de su Casteddu e de sa Natzionale italiana premiadu dae su senadore Lucio Abis, chi in cussu tempus fiat presidente de sa Regione. Su Comune at fintzas comintzadu unu raportu istitutzionale de importu chi dae inoghe a pagu tempus l’at a bìere gemelladu cun Leggiuno, sa bidda de nàschida de Rombo di Tuono. Pròpiu in custas dies est arribada sa cunfirma e s’interessu de sa gente de Leggiuno a chèrrere istitutzionalizare luego su patu de amigàntzia intre sas duas comunidades.
E semper a Gigi Riva, in fines, dd’ant a intutilare fintzas su campu isportivu de Làconi. Comente acabbant sos traballos de acontzu, ant a cuncordare una tzerimònia pro intitulare s’impiantu in s’àrea isportiva “Vincenzo Dotzo” a s’ammentu de Riva.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
