Novas Aristanesas, giòbia 29 de freàrgiu de su 2024
Sos addòbios de custa coa de chida in provìntzia de Aristanis – Addòbios meda custa coa de chida in provìntzia. Sàbadu 2 de martzu in Ula b’est su Carrasegare Ulesu cun sa de XIV rassignas de sas màscaras de su connotu: sas caras e sos personàgios prus amados de s’Ìsula ant a èssere protagonistas in sa bidda de su Barigadu. Si comintzat su mangianu in su tzentru pro sos servìtzios sotziales de carrera de Casteddu cun unu cunvegnu in contu de su Carrasegare sardu pro lassare logu a pustis a merie a s’isfilada de sas màscaras in sas carreras de su tzentru istòricu, finas a pratza IV Novembre. At a presentare s’eventu Lucia Cossu e in fines b’ant a èssere sos ballos sardos cun sos Dilliariana e su dj set de Daniel Cossu. Su Carrasegare Ulesu est organizadu dae s’assòtziu culturale S’Urtzu e Sos Bardianos de Ula cun s’agiudu de su Comune de Ula e de sa Regione Sardigna.
In Tzrofolliu imbetzes s’addòbiu est cun sa de 26 editziones de sa Sagra de sos Agrumes, organizada dae sa Pro Loco e dae su Comune. Duas dies, sàbadu 2 e domìniga 3 de martzu, totu dedicadas a sa manifestatzione cun unu calendàriu ricu de assàgios, eventos e espositziones.
In Abas, semper sàbadu 2 de martzu, s’at a faeddare de memòria istòrica, identidade e benidore de sa terra crua, su làdiri, cun sos matones traditzionales fatos cun terra lugiana, abba e pàgia. Totu custu paris cun s’architeta Sara Collu chi presentat in sa Domo de Nàschida de Antoni Gramsci s’òpera sua “Làdiri – Su respiru de sa terra crua in Sardigna”.
In fines in Marmidda comintzat su primu caminu de s’initziativa noa “Passeg…Giare”: domìniga 3 de martzu s’at a andare a Sini, Aressa e Bobadri pro iscobèrrere necròpoli e menhir, finas a sas olias seculares e mèndulas in frore ma fintzas a visitare sos tzentros istòricos de sos tres comunes de su Cunsòrtziu turìsticu Duas Jaras, su matessi chi paris cun s’agiudu tènnicu de Sardigna Trail e cun s’agiudu de sas Pro loco e de àteros assòtzios de su logu at organizadu custa initziativa.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
