domenica, 23 Febbraio, 2025

Novas Aristanesas, lunis 5 de freàrgiu de su 2024

Is ischedas pro is Eletziones regionales in provìntzia de Aristanis – Su 30 de ghennàrgiu, in un’àula de sa Corte de Apellu de Casteddu, ant tiradu a billetes s’òrdine de ponidura de is candidados a presidente e de is listas acapiadas a issos in s’ischeda eletorale pro is Eletziones regionales de su 25 de freàrgiu 2024 pro su Presidente de sa Regione e pro s’annou de su Consìgiu regionale de Sardigna.

S’òrdine de ponidura, chi at a èssere sa pròpia in totu e is oto collègios sardos de Tàtari, Terranoa-Tèmpiu, Nùgoro, Ogiastra, Aristanis, Campidanu de Mesu, Sulcis-Igresiente e Casteddu, est resurtadu custu: sa prima est sa candidada de su Campu Ladu Alessandra Todde, sighida dae Paolo Truzzu, chi ghiat is listas de su Tzentru-Dereta; sighint Renato Soru cun sa cambarada sarda e, ùrtima, Lucia Chessa.

Imbetzes, s’òrdine de presentada de is listas in is ischedas de sa tzircuscritzione de Aristanis at a èssere custu: pro Alessandra Todde, su primu postu est tocadu a Manca pro su Benidore, sighida dae Demos Democratzia Solidale, Partidu Democràticu de Sardigna, Alleàntzia Birdes, Partidu Sotzialista Italianu Sardos in Europa, Aunidos pro Alessandra Todde, Movimentu 5 Isteddos, Orizonte a Cumone, Fortza Paris e Progressistas.

Sa cambarada de Tzentru-Dereta in agiudu de Paolo Truzzu cumentzat, imbetzes, cun Fortza Itàlia, Frades de Itàlia e Alleàntzia Sardigna Partidu Liberale. Ddoe sunt in prus is listas de sa Lega Salvini Sardigna, Refurmadores Sardos, Democratzia Cristiana cun Rotondi, UDC Sardigna, Partidu Sardu de Atzione e Sardigna in Tzentru 20/binti.

S’òrdine de is listas in agiudu de Renato Soru previdit + Europa – Atzione, Movimentu Progetu Sardigna, Partidu de sa Refundatzione Comunista – Manca Europea, Lìberu e Vota Sardigna. S’ischeda eletorale at a acabbare cun sa candidada Lucia Chessa e cun sa lista Sardigna R-Esistit.

A sa tzircuscritzione de Aristanis ddi tocant ses sègios in su Consìgiu regionale imbeniente. S’at a votare su 25 de freàrgiu, dae is ses e mesu de mangianu fintzas a is deghe de note.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

ospite
ospite

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

Contatti: posta@oristanonoi.it

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

© Newspaper Theme | All rights reserved