domenica, 23 Febbraio, 2025

Novas Aristanesas, martis 13 de freàrgiu de su 2024

Sas chentenàrias noas de sa provìntzia de Aristanis

Sas chentenàrias noas de sa provìntzia de Aristanis – S’annu nou at batidu traguardos mannos meda pro sas comunidades de sa provìntzia: sas biddas de sa provìntzia de Aristanis ant festadu a tantas fèminas chi sunt imbàtidas a sos chentu annos. 

Aristanis at festadu sos chentu annos de Gianneta Maròngiu e de Eva Dessì. Sa sennora Maròngiu est de Crabas e pro annos meda at gestidu unu tzilleri cun sala biliardu de sa tzitade cun su maridu. Mama de tres fìgios, tenet tres nebodes e ses fìgios de nebodes. Intre sas dotes mannas suas, b’est cussa de sa coghina, tantu chi fintzas a Pepeto Pau li praghiat a andare a domo sua pro assagiare su puddu cun bagna. 

Fintzas sa sennora Dessì est connota meda in tzitade pro sa parte sua in sa Cooperativa allevatrici sarde: in fatis est una de sas primas sòtzias. Unu de sos primados suos est fintzas cussu de èssere una de sas primas fèminas chi at aviadu un’agriturismu e ancora oe sighit a coltivare sa terra e a tènnere  contu sas puddas suas. Sa chentenària est fintzas religiosa meda e at fatu pellegrinàgios meda.

Ollasta imbetzes at festadu a Amelia Orrù, ùnica chentenària de sa bidda. At semper bìvidu in Ollasta e s’est cojuada cun un’òmine de sa matessi bidda. Dae cando fiat pitzoca at semper traballadu comente mastra de cosire, faghende costùmenes traditzionales e bestimentas de òmine. A sos chimbe nebodes lis at regaladu una tiàgia ricamada cun dèdica. Dae pagu tempus at renuntziadu a traballare a untzineto e a ricamare e si dèdicat a sos nebodes e a ammentare contos meda de su passadu. 

In Sune festa manna pro Giovanna Àngela Spada, inghiriada dae s’amore de sos tres fìgios e duos nebodes. Sa vida sua de seguru no est istada fàtzile: est abarrada òrfana a tres annos, at traballadu in campagna dae cando fiat minore. A pustis chi s’est cojuada s’est trasferida a Isvìtzera cun su maridu, in ue at agatadu traballu in unu ristorante pro bator annos. Mancari sas contrariedades, sa sennora Spada est reconnoschente meda pro sa vida longa, fata de amore meda e rispetu. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22. 

Red
Red

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

Contatti: posta@oristanonoi.it

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

© Newspaper Theme | All rights reserved