Novas Aristanesas, martis 27 de freàrgiu de su 2024
Sos resurtados de sas eletziones regionales in provìntzia de Aristanis – Cun su votu de domìniga 25 de freàrgiu sos sardos ant elègidu a su presidente nou pro ghiare sa Regione: Alessandra Todde est sa prima presidente fèmina in s’istòria de s’Ìsula.
Cun unu “testa a testa” fatu de sorpassos pari-pari, Todde e su campu largu ant bìnchidu subra de s’alleàntzia de tzentru-dereta ghiada dae Paolo Truzzu. Sos àteros duos candidados – Renato Soru pro s’alleàntzia sarda e Lucia Chessa pro Sardegna R-esiste – no ant a tènnere imbetzes unu postu in Cussìgiu, ca non sunt resurtados a barigare s’isbarramentu de su 10% de preferèntzias.
Sa tzircuscritzione de Aristanis, est istada però diversa in cunfrontu a su restu de s’Ìsula: sa gente chi at votadu in fatis at preferidu sa coalitzione de tzentru – dereta. Mancari duas setziones de Bonacatu non siant resurtadas a cumpletare s’ispòlliu de sas ischedas, chi at a èssere afidadu a su Tribunale de cumpetèntzia, paret craru chi apat bìnchidu Paolo Truzzu.
Su tzentru-dereta in fatis at tentu su 50,2% de sas preferèntzias, mentres su campu largu s’est firmadu a su 38,5%. A subra de sas pertzentuales regionales fintzas sas preferèntzias pro Renato Soru, chi at leadu su 10,3%. Lucia Chessa at otentu imbetzes s’1% de sos votos.
In su campu largu, sas tres listas prus votadas sunt su Partidu Democràticu, su Movimentu 5 Isteddos e Sinistra Futura. Pro s’alleàntzia ghiada dae Truzzu sunt Fratelli d’Italia, sos Riformadores Sardos e Forza Italia Berlusconi; mentres pro cussa de Soru sunt Movimento Progetto Sardegna, Vota Sardigna e +Europa – Azione. Sa lista de Lucia Chessa Sardigna R-esiste at tentu imbetzes su 0,6% de preferèntzias.
In sa mangianada de oe sa presidente apenas elègida at faeddadu cun sos giornalistas. “So cuntenta meda de èssere sa prima fèmina presidente de sa Regione. A pustis de 75 annos semus resurtados a segare custa cobertura de cristallu”, at cummentadu Todde. “Torro gràtzias fintzas a totu sas fèminas de s’iscuadra mia pro sa parte chi ant tentu e pro su traballu chi ant fatu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
