Bonìficas in Turre Manna – In Turre Manna unos cantos tretos demaniales ddos ant torrados a su Cumpartimentu marìtimu de Aristanis, mentras àteros ddos ant agiudicados in un’asta pùblica a unos cantos comporadores privados.
Su sìndigu Massimiliano Sanna e su capu de su Cumpartimentu marìtimu Federico Pucci ant firmadu unu verbale chi torrat is tretos demaniales de Turre Manna a su Cumpartimentu. In cussos tretos su Comune de Aristanis ddoe at fatu sa bonìfica dae s’amiantu.
In sa parte Nord de sa borgata marina ddoe ant bonificadu unu tretu de unos 1.370 metros, dae su capannone in ue ddoe fiat su cantieri navale fintzas a su portigheddu. In sa parte Sud, imbetzes, sa bonìfica at interessadu unu tretu de unos 1.750 metros, dae su primu a su de duos pontiles, dae sa praja fintzas a s’opinedu.
Su progetu de 210 mìgia èuros previdiat de nde boddire totu s’alighìngiu cun amiantu dae su pìgiu de a subra de sa costera.
Imbetzes, de is tres lotos fabricàbiles postos in s’asta dae su Comune de Aristanis in is meses passados, duos ddos at comporados su pròpiu comporadore, identificadu comente a Casula B, e unu sa sotziedade Baby Company. Custos lotos in ue si podet fraigare s’agatant in bia de is Piscadores.
Casula s’at agiudicadu su lotu cun nùmeru de òrdine 31 cun un’oferta de 140.500,99 èuros (sa base de asta fiat de 99.000 èuros) e su lotu nùmeru 36 cun un’oferta de 193.680,99 èuros (sa base de asta moviat dae 161.400 èuros).
Imbetzes, cun un’oferta de 175.500 èuros (cun una base de asta de 172.800 èuros) sa Baby Company nche est renèssida a leare su lotu nùmeru 35.
Pro is lotos fabricàbiles, a su protocollu generale de su Comune de Aristanis ddoe sunt arribadas ses ofertas in totu: duas pro su lotu 31, una pro su lotu 35 e tres pro su lotu 36.
Custos lotos de terra, chi faghiant giai parte de su Pranu de is bèndidas, su Comune ddos ant pòdidos bèndere in s’asta a pustis de àere agatadu sa solutzione a su problema de is impreos tzìvicos in sa borgata marina, chi nd’aiat firmadu s’alienatzione.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
