Novas Aristanesas, mèrcuris 28 de freàrgiu de su 2024
Sos servìtzios noos de sa Asl 5 – Arribant servìtzios noos pro sos utentes de sa Asl 5 de Aristanis cun sas novas postas in campu dae s’azienda sanitària.
Si partit cun sa creatzione de tres istruturas dipartimentales sìmplitzes, ghiadas dae tres diretoras. Sa prima est cussa dedicada a s’Integratzione Ispidale-Territòriu, ghiada dae sa dotora Marilena Muggianu. Abertas fintzas s’Istrutura “Assistenza Domiciliare Integrata”, dirìgida dae sa dotora Marina Cossu e s’Istrutura “Riabilitazione, day hospital e ambulatoriale specialistico”, dirìgida dae sa dotora Marta Carta.
S’azienda sanitària nch’at agiuntu puru s’Istrutura de “Otorinolaringoiatria” de s’ispidale Santu Martinu de Aristanis, dirìgida dae s’ispetzialista Andrea Melis. Pro festare sa nàschida sua, at a abèrrere a su pùbblicu cun consultos a gratis, e sos postos a disponimentu nche sunt finidos in pagas oras.
Un’àtera nova de sos meses passados, est sa nàschida de s’Istrutura de Senologia, chi est traballende meda dae santugaine, dirìgida dae su dutore Luciano Curella. Sas fèminas podent contare in agiudu e percursos dedicados de su totu a sas maladias benignas e malignas de sa mammidda.
In su Consultòriu de Ilartzi torrant cun un’editzione noa sos addòbios de agiudu a sa nàschida pro sas fèminas chi tenent pitzinnu in caminu. Dae su 28 de freàrgiu a su 14 de martzu, sas fèminas chi ant a èssere mamas ant a pòdere tènnere cussìgios pràticos meda pro afrontare unu de sos momentos prus de importu de sa vida issoro cun serenidade.
In su Consultòriu de Terraba imbetzes b’at a àere una nova: dae martzu partit su Spazio Giovani, riservadu a sos giòvanos intre sos 14 e sos 25 annos. Est unu servìtziu dedicadu a iscurtare e a cumprèndere, in ue sos giòvanos ant a èssere lìberos de afrontare in libertade temas chi pertocant s’adolescèntzia e su caminu de crèschida. Su Spazio Giovani at a abèrrere su lunis dae sas 14,30 a sas 17,00 e sa giòbia dae sas 15,00 a sas 17,00.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
