domenica, 23 Febbraio, 2025

Novas Aristanesas, lunis 25 de martzu de su 2024

Sa Chida Santa in Aristanis

Sa Chida Santa in Aristanis – A pustis de sas funtziones de su Domìnigu de Pramma, dae oe cumintzant sos ritos de Chida Santa intra de sas funtziones religiosas e prufessones chi s’ant a fàghere intra de sa Sea e sa crèsia de Santu Frantziscu de Aristanis.

Su calendàriu de sas funtziones de sas tres dies de Pasca chi at istabilèssidu s’Artzidiòtzesi sighit custu sero cun sa Prufessone de Is Mistèrius a sas 19.00. Giòbia Santa a mangianu, (28 de martzu), imbetzes s’apuntamentu est cun sa missa de s’ògiu santu, chi at a èssere in catedrale a sas 09.30 e dda narat s’Arztipìscamu Carboni paris a su presbìteru de Abas-Terraba. A sas 17.00 sa missa “in coena Dòmini” chi at a tzelebrare Munsennore Gianfranco Murru, prèide de su capìtulu metropolitanu, cun sa sabunadura de sos pees. A sas 21.00 sa prufessone de Su Jesus e sa bisita a sos sepùlcros.

Cumintzant sas funtziones Chenàbura Santa (29 de martzu) a sas 8, in Catedrale, cun sa funtzione capitulare de s’Ufìtziu de sas leturas e sas lodes de mangianeddu mentras a sas 16.30 ddoe at a èssere sa Prufessone de Sa Maria. A sas 17.00, in su Duomo de Aristanis, sa Passione de Deus e a pustis Su Scravamentu. Su preigadore at a èssere Don Mario Giuseppe Conti e at a cantare Su Cuncordu de Mesaustu. A s’agabbu de su Scravamentu de Cristos dae sa rughe, sa prufessone de S’interru, chi dae su Duomo lompet a pratza de Santu Martinu, passende peri bia de Vittorio Emanuele, pratza Mannu e arburada de Santu Martinu.

Sàbadu Santu, 30 de martzu, a sas 8.00 in Catedrale ddoe at a èssere sa funtzione capitulare de s’Ufìtziu de sas leturas e lodes de mangianeddu, mentras a sas 21.30 sa Missa Manna de sa note de Pasca, cun s’Artzipìscamu de Aristanis e Abas, Roberto Carboni.

In fines, domìnigu de Pasca Manna (31 de martzu) sas funtziones religiosas ant a cumintzare a sas 9.45 cun s’Incontru e, a sas 10.00, sa missa dda faghet Munsennore Gianfranco Murru e, a pustis, sa Prufessone de Sa Glòria.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Red
Red

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

Contatti: posta@oristanonoi.it

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

© Newspaper Theme | All rights reserved