Sa festa de sas fèminas in provìntzia de Aristanis – Pro s’oto de martzu, Die internatzionale de sos diritos de sas fèminas, sunt medas sas fainas in programma in provìntzia de Aristanis.
In Terraba, pro nde nàrrere una, su Teatro delle Gocce, at a presentare “I monologhi della Vagina”, bogadu dae s’òpera de Eve Ensler, un’ispetàculu dòpiu, in programma chenàbura 8 de martzu, a sas bator e a pustis a sas sete de sero, in su Teatru comunale de Terraba. In suba de su palcu, unu a pustis de s’àtera, bìndighi atritzes pro contare istòrias isfatziddias e irònicas ma fintzas pro chistionare de temas iscòmodos, e cumpartzire cun sa comunidade de su giassu de Terraba pensamentos de importu in contu de su tema de gènere in ocasione de sa Die internatzionale de sa fèmina.
In Aristanis a sas noe, s’addòbiu “Oltre il silenzio”. Dd’at cuncordadu su Tzentru contras a sa violèntzia “Donna Eleonora” de Aristanis, paris cun s’assòtziu Prospettiva Donna e su Cussìgiu regionale de s’Ente Natzionale Surdos, su cunvegnu at a dare atentu mannu a s’inclusividade gràtzias a su servìtziu de interpretariadu de sa limba italiana de sos sinnos.
Semper in Aristanis sa de XI rassignas de “Fèminas chi ispantant”. Cun sa diretzione artìstica de su mastru Giovanni Andrea Puddu, a sas sete de sero in su palcu de s’auditòrium de Santu Domìnigu, ant a cantare su coro Sa Pintadera, chi ghiat Puddu, Su Cuntzertu Antigu, ùnicu grupu musicale de istrumentos traditzionales sardos totu de fèminas, e su coro polifònicu feminile Bonucaminu de Ardaule cun su mastru Michele Turnu. Pro s’ocasione at a èssere presente fintzas sa cantautrice Maria Luisa Congiu. At a presentare Lucia Cossu.
In Aristanis apuntamentu a sas chimbe de sero fintzas in su Coworking in bia De Vittorio Emanuele, cun su primu addòbiu de “Istòria e cussèntzia”, sa faina noa de sa Cgil cun s’Iscola de su Pòpulu, in ue s’at a chistionare de su tema de su voluntariadu “a su feminile”. In fines in su Tzentru culturale Unla, semper a sas chimbe de sero, un addòbiu chi at cuncordadu s’Anpi intituladu “Fèminas, diritos, traballu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
