Novas Aristanesas, chenàbura 19 de abrile de su 2024
Sa rassigna de Fordongianus – In Fordongianus torrant a cuncordare sa rassigna de importu “Forum – Artes, Passiones e Sabores”, cun duas dies pro iscobèrrere su territòriu e is richesas suas, gràtzias a una filera longa de laboratòrios, bìsitas ghiadas, addòbios, mùsica e màndigos bonos. Protagonista at a èssere sa comunidade de Fordongianus, chi at a abèrrere is ghennas de 15 domos a totu is bisitadores chi ant a bòlere iscobèrrere is produsimentos de su Barigadu.
Ma ddoe ant a èssere fintzas is laboratòrios contivigiados dae is mastros artesanos, chi ant a fàghere provare a is bisitadores unas cantas cosas: su ricamu, is erbas fragosas impreadas in sa meighina sarda de su connotu, s’arte de traballare sa pedde, sa linna, sa prata e s’oru, s’arte de iscrìere is fumetos.
In custas duas dies, in prus, s’ant a pòdere bisitare una cava de pedra bia, sa crèsia de Santu Lussurzu, is bàngios antigos e sa Domo aragonesa. Chie, imbetzes, at a bòlere gosare de su sartu de Fordongianus a manera diferente at a pòdere sètzere a kayak e navigare in unu tretu de su Tirsu o sètzere a mountain bike e fàghere una bella passigiada a bitzicleta.
Ma ddoe at a àere fintzas mùsica sarda de su connotu e mùsica de dies de oe, cun baddos in cumpangia fintzas a note tarda; in prus, s’ant a pòdere bìere is ispetàculos de is artistas de bia itinerantes. E, pro is pipios, unu muntone mannu de àteros giogos.
E s’ant a pòdere tastare màndigos bonos e cosa de bufare: sa Pro Loco de Fordongianus, difatis, at a contivigiare una parada in ue s’at a pòdere papare siat pro pràndere siat pro chenare, cun aperitivu e màndigos de bia.
“Amus megioradu su programma de sa manifestatzione cunforma a cuddu de s’editzione passada: como est prus ricu”, narat Giannetto Oppo, presidente de sa Pro Loco de Fordongianus, chi paris cun su Comune cuncordat sa rassigna. “S’editzione de ocannu est una prenda totu de iscobèrrere”, acabbat Oppo, “is ghennas de sa bidda sunt abertas a totu is chi nche ant bòlere passare una coa de chida in custa bidda de Barigadu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
