S’istadiale cun sa Fundatzione Mont’’e Prama – In prus pagu de una chida non s’agatat prus unu billete pro s’ispetàculu “Roberto Bolle and Friends”, cuncordadu dae sa Fundatzione Mont’’e Prama e chi at a portare a su primu baddadore e a àteros isteddos internatzionales de sa dantza a subra de su palcu de Tharros su 12 de trìulas.
S’ispetàculu de Roberto Bolle paris cun is àteros duos cuntzertos, cussos puru giai totu prenos in pagu tempus, de Fiorella Mannoia, faghent parte de su calendàriu de addòbios, fèstival e àteras fainas culturales de s’istadiale cuncordados dae sa Fundatzione Mont’’e Prama, chi ocannu afestat su de chimbanta annos dae s’iscoberta de is istàtuas de is Gigantes.
In is dies passadas, su presidente Anthony Muroni at annuntziadu una pariga de is apuntamentos prus de importu chi ant a piessignare s’istadiale, cun is fèstival iscientìficos de sa Fundatzione Mont’’e Prama, ma fintzas cun addòbios “pop” chi tenent sa punna de avalorare is logos archeològicos, is bellesas paesagìsticu-ambientales e s’enogastronomia de su Sinis.
Unas cantas datas sunt giai istabilèssidas. Su “Fèstival internatzionale de s’Archeologia S’ìsula de is Gigantes” at a cumentzare su 21 de làmpadas e at a tirare fintzas a su 29. Dd’amus a fàghere no isceti in Crabas, ma fintzas in àteras biddas de sa provìntzia de Aristanis”, at naradu su presidente de sa Fundatzione Mont’’e Prama, Anthony Muroni. “Su Sardinia Archeofilm fèstival s’at a fàghere dae su 2 a su 4 de trìulas in Tharros e, semper in cue e totu, dae su 6 a su 9 de trìulas, ddoe at a èssere su Fèstival literàriu de s’archeologia Unu biàgiu paris longu tres mìgia annos”.
In Tharros etotu ant a cuncordare is addòbios pro regordare is 50 annos dae s’iscoberta de is istàtuas de Mont’’e Prama: a prus de Roberto Bolle su 12 de trìulas e de is cuntzertos de su 21 e 22 de trìulas de Fiorella Mannoia, su 17 at a tocare a su Teatru de Sardigna cun “Sa die de su giudìtziu”, su 18 a s’Orchestra de su Teatru lìricu de Casteddu e, in fines, su 19 e su 20 de trìulas a su Fèstival Dromos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
