Novas Aristanesas, lunis 15 de abrile de su 2024
Sa situatzione de sa sanidade – Is problemas de sa sanidade aristanesa oramai sunt nòdidos: pagos mèigos de base, ispidales in suferèntzia pro more ca su personale est pagu e is malàidos chi bortas meda depent biagiare pro pòdere retzire is curas e s’assistèntzia chi ddis bisòngiat. Intra de rèvocas de mèigos e progetos noos de assistèntzia sanitària, sa provìntzia de Aristanis presentat oramai duas faches de sa pròpia medàllia.
Si a un’ala s’abertura de is Ascot, is ambulatòrios territoriales, in deghe biddas de sa provìntzia at dadu unu pagheddu de ossìgenu a is malàidos chi sunt sena de mèigu de base, a custa filera de malassortados si ddoe atzunghent immoe unas àteras milli persones.
In s’interis est iscadida fintzas sa simana de dèroga de su massimale de is assistidos, chi dd’aiant portadu dae 1.500 a 1.800, e is siendas sanitàrias amegant de domandare a is mèigos de dare sa disponibilidade issoro a manera voluntària.
In Marmidda, imbetzes, sa solutzione dda dat una filera de progetos chi punnant a fàghere de custu sistema unu logu de riferimentu de importu in totu su territòriu regionale.
Pro parare fronte a s’imbetzamentu de sa populatzione e a sa chistione de un’assistèntzia sanitària chi non totus nde podent gosare, is 19 biddas de s’Unione in su tempus benidore ant a pòdere contare a subra de sa figura de s’infermieri de comunidade.
Cun unu tantu de oras che a pare pro totu is biddas e, in prus, cun unu tantu de oras a tenore de su nùmeru de is bividores, s’infermieri de comunidade at a assegurare s’assistèntzia a is malàidos e a is famìllias issoro.
Àteros duos pranos pertocant Abas: si previdet un’ispidale de comunidade cun a su mancus 15 letos, chi at a pòdere acasagiare a is malàidos a pustis de is operatziones chirùrgicas e in sa simana de sa riabilitatzione, e unu tzentru pro sa cura de is istorbos alimentares, unu logu de cura de importu chi at a èssere su riferimentu pro totu sa regione.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
