Novas Aristanesas, lunis 8 de abrile de su 2024
Arribat un’àtera nave de crotzera – Sa provìntzia de Aristanis at acasagiadu a una cambarada manna de turistas italianos, ispagnolos, frantzesos, tedescos, austrìacos, olandesos, inglesos, belgas, isvìtzeros, argentinos, de is Istados Aunidos, sudamericanos e de unos cantos paisos de s’Àsia, isbarcados dae sa nave de crotzera “Costa Diadema” in su portu de Aristanis – Santa Justa, pro iscobèrrere is bellesas de sa provìntzia e de sa tzitade.
Apenas calados dae sa nave, a is biagiadores ddos ant retzidos cun unu cumbidu pro ddis dare su “benebènnidos”: sa Coldiretti at cuncordadu una parada cun is produsimentos de su territòriu, mentras unos cantos pitzocos e pitzocas cun sa bestimenta de su connotu ddis ant cumbidadu carchi durche de mèndula, guefos e pistocos.
Cun su colore de viola de sa bestimenta de su connotu, sa cambarada mini folk “Su Minditzu” de Santa Justa at fatu una pariga de baddos, cun s’acumpangiamentu de sa mùsica de unu sonete.
Cun prus de 20 postales chi ddos abetaiant, is crotzeristas sunt mòvidos cara a is logos chi aiant seberadu de bisitare: in medas ant seberadu de bìere is bellesas de su Sinis, àteros ant prefertu de andare a bìere su nuraghe Losa de Abbasanta e su putzu sagradu de Santa Cristina de Paulle, medas s’ant fatu una passigiada bella peri is bias de sa tzitade de Lionora de Arbaree.
In Aristanis, is bisitadores ant chertu iscobèrrere s’istòria de sa tzitade, connoschende is monumentos prus nòdidos de sa parte antiga: dae s’Hospitalis Sancti Antoni, a sa turre de Santu Cristolu, a su Tzentru de documentatzione de sa Sartìllia, a sa Sea de Santa Maria, sa crèsia de Santu Frantziscu, pratza de Tzitade e pratza de Porta manna.
Un’àtera cambarada imbetzes at seberadu de bisitare Turri Manna, in ue ant pòdidu bìere sa turre e ant pòdidu tastare is produsimentos de sa provìntzia de Aristanis gràtzias a una faina cuncordada dae Coldiretti.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
