Sa coa de chida in provìntzia de Aristanis – Finas custa coa de chida tantos apuntamentos e addòbios in provìntzia de Aristanis, pro nche passare carchi ora in cumpangia.
Sa die de sàbadu s’aberit a mangianu cun sa firmada in Nurachi de Monumentos Abertos, cun bìsitas a paritzos logos interessantes finas in sa die de domìniga. A su sero est a atopare a Cantina Caddeo pro inaugurare CantinArte. Est in programma s’inauguratzione de sa mustra Géricault e s’ispetàculu de cabaret-literàriu “Contos irònicos e balladas pagu rispetosas” cun Flavio Sòriga, Riccardo Atzeni, Samuele Dessì e Renzo Cugis.
A merie in Uras un’àteru cunvegnu de sa filera de atopos “Intritzos de ideas”. In programma “Finas unu marcu… scòviat” cun una drammatizatzione a incuru de Maria e Gianfranco Delogu, e s’interventu de Maria Delogu, voluntària de su tzentru contras de sa violèntzia “Donna Lionora” de Aristanis, chi at a faeddare cun Alessandra Coròngiu de s’Iscola de su Pòpulu e Daniela Masia de s’Isportellu Limba Sarda de Uras, cun su coordinamentu de s’Istitutu de Istùdiu e Chircas Camillo Bellieni.
Sàbadu die prena in Aristanis: a mangianu s’at a innetare sa biddighedda de Turre Manna cun sa passigiada ecològica e a sero s’at a andare a su Teatru Garau pro ascurtare sas boghes de su cuncursu corale regionale de cantos in sardu “Cantos e Ammentos”, cuncordadu dae su coro feminile Sa Pintadera.
In prus de sos meres de domo, ant a cantare sos coros “Sant’Antoni” de Otzana, “Lorenzo Perosi” de Durgali, “S’Ispera” de Ollollai, “Sant’Anna” de Tortolì; “Santu Màuru” de Sòrgono, “Lachesos” de Mores; “Santu Nigola” de Ortueri e su de Igrèsias. A intro de custu merie presentadu dae Giuliano Maròngiu est previdida un’esibitzione de su tenore de Neoneli.
Sàbadu in Mòguru sighit Tragogò Fest 2024, su fèstival de su risu. A sas 9 de sero in su teatru comunale s’at a fàghere s’ispetàculu “Trop Secret Show” de Andrea Fratellini. Domìniga serrat su calendàriu de eventos “Bell’ è s’Arrisu”, sa prima rassigna còmica regionale firmada Tragogò Fest e presentada dae Alverio Cau.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
