Novas Aristanesas, giòbia 13 de làmpadas de su 2024
Is fainas de Campànnia Amiga in iscola: unu primu bilàntziu – Sunt istadas medas is fainas fatas dae Campagna Amica de sa Coldiretti in is iscolas aristanesas, chi tenent comente a protagonista su màndigu bonu e s’educatzione alimentare.
In s’Istitutu superiore “Don Deodato Meloni” de Aristanis ddoe ant cuncordadu “S’ògiu bonu”, un’àndala de informu, de tastadura e de nuscu pro iscobèrrere s’ògiu ermanu.
Sos pitzocos de s’Alberghieru gasi ant a pòdidu profundare is impreos in coghina e is particularidades territoriales de custu produsimentu identitàriu. Ma is fainas sunt sighidas fintzas in is mercados de produtos de s’agricoltura e, in su mese martzu passadu, in s’Istitutu Cumprensivu 2 de Aristanis, cun is classes primas de sas elementares.
“S’ògiu aunit totu sa Sardigna”, narat su Presidente de Coldiretti Aristanis, Paolo Corrias, “is logos diversos de s’ìsula produint ògiu ermanu de calidade, ma cun sabores diversos segundu su territòriu. Faeddamus de unu patrimòniu cun variedades meda, chi amparat sa bio-diversidade e acomunat su produtu in sas caraterìsticas organolèticas bonas meda”.
S’Istitutu “Don Deodato Meloni” e s’assòtziu ant promòvidu puru “Campànnia Amiga Gourmet”, su cuncursu eno-gastronòmicu riservadu a is Istitutos alberghieros regionales.
In abrile is pitzocos ant fatu a trivas in s’Istitutu aristanesu aprontende màndigos cun arrosu de Sardigna. Onni cambarada fiat formada dae tres istudiantes chi frecuentaiant su de 3, 4 e 5 annos.
Su cuncursu est imbàtidu a sa segunda editzione: s’ingrediente protagonista de ocannu passadu fiat s’angione sardu IGP. Aiant bìnchidu sos istudiantes de s’Istitutu alberghieru de Tortolì.
“S’iscola rapresentat su logu ideale pro faeddare de s’importu de un’impreu cussente in intro de sa dieta chi previdet produtos friscos, de istajone e locales”, at congruidu su responsàbile regionale Campagna Amica Coldiretti, Serafino Mura.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
