Una simana de fògora – S’istadiale – comente est normale chi acontessat – batit un’undada de fògora cun temperaduras chi ant a lòmpere a 35°. Segundu is previsiones de 3B Mèteu nd’at a arribare un’unda de calore, cun temperaduras intra de 4 e 6 grados prus artas de sa mèdia de s’istasone.
In provìntzia de Aristanis puru s’àera at a èssere buddida che fogu. Si prevident puntas chi ant a propassare is 32°, 34° in Fordongianus, una de is biddas in ue sa fògora s’at a intèndere de prus. E chida chi benit at a èssere fintzas peus. Su termòmetru at a lòmpere a 34° unu pagheddu in ònnia logu in provìntzia de Aristanis. E in Fordongianus, Asuni, Bàini e in Simaghis nche at a artziare fintzas a 36°.
Sa colunnedda de mercùriu at a marcare intra de 30° e i 32° fintzas in is biddas prus artas de sa provìntzia: Neoneli, Santu Lussurzu e Làconi. Is temperaduras ant a ismenguare unu pagheddu giòbia, ma at a sighire a fàghere basca meda etotu.
Si racumandat a is antzianos e a is personas malàidas de non bessire a ora de sole, de si pònnere bestimenta lèbia e de apoderare su corbus idratadu bene.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
