Sa gherra contras de s’incuinamentu in provìntzia de Aristanis – Su 15 de làmpadas s’est afestada sa Die mundiale de s’ambiente e de is otzèanos e in cussa ocasione s’assòtziu Plastic Free (Sena de Plàstica), paris cun is voluntàrios de Aressa e de Crucuris, ant detzisu de respùndere a s’apellu regollende chintales de àliga dae unos cantos logos de Marmidda.
In Aressa, pro sa passigiada ecològica chi ant fatu su sàbadu in antis e in ue ddoe ant leadu parte su referente de zona Luciano Montanari, su sìndigu Mario Cau, prof.re Marco Antonio Scanu e is voluntàrias Maria Eugenia e Bruna, nd’ant boddidu chentu chilos de àliga.
Sa die in fatu, is fainas de is voluntàrios (fiant in batòrdighi!) ant tramudadu a Crucuris. Presentes su sìndigu Raffaele Pilloni, sa vitzesìndiga Roberta Frau e àteros amministradores crucuresos, nd’ant boddidu 250 chilos de àliga abbandonada in is sartos de sa bidda. A prus de unos cantos sacos de plàstica de ònnia genia, ampuddas de bidru e bòtulos de liàuna, no est mancada calicuna gomma betza de màchina, bòtulos e àteros istèrgios betzos, cartotza e unu muntone mannu de eletrudomèsticos: isbentuladores, iscumbatidores, phon, decoder, unu forrigheddu a microundas, unu televisore e un’istufighedda elètrica.
Fainas che a custa sunt de importu mannu, pro ite ca sa gente non semper pigat in cunsideru sa tzivilesa e su respetu pro s’ambiente. Pro nàrrere, una pariga de dies a pustis de sa Die mundiale de s’ambiente e de is otzèanos, in is sartos de Arborea unu tzitadinu at agatadu sachitos fuliados, prenos de ònnia genia de àliga, e fintzas duos wc mannos. E, prus in dae in antis, iscàtulas de ònnia genia e trastos de imbrachinadore. A dolu mannu, su de lassare àliga oru oru de is bias e in is fascas forestales de sa bonìfica est un’avesu malu chi tenent in medas. Su muntonàrgiu in logu abertu fiat in sa bia longitudinale 40, fasca 7.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
