S’Ente pro is Cuntzertos de Aristanis nde istudat 50 candeleddas – Sunt sa bellesa de 50 is candeleddas chi ocannu nd’at a istudare s’Ente pro is Cuntzertos de Aristanis: est dae 50 annos, difatis, chi s’istitutzione aristanesa abbiatzat su cabu-logu e totu sa provìntzia cun ispetàculos musicales de calidade e de giudu.
E, pro afestare custu traguardu de importu, s’Ente at traballadu cun afetèriu mannu pro cuncordare su calendàriu de is duos apuntamentos de is duas rassignas chi cuncordat onni annu, est a nàrrere “Mùsica in is meries de istadiale” e “Domìnigu in cuntzertu”.
Sa prima at a cumentzare su 28 de làmpadas e at a sighire fintzas a su 13 de cabudanni, cun sa proposta de gèneres musicales diferentes, capatzos de acuntentare a totus, in logos diferentes de sa tzitade. In calendàriu ddoe sunt is “Zirichiltaggia” cun cantzones de Fabrizio De Andrè; su tenore Francesco Demuro, acumpangiadu dae su pianista Andrea Mudu; sa violinista Anna Tifu cun su Tango Quartet suo e su “Jorge Rossy Vibes Trio”.
In cabudanni s’at a pòdere ascurtare a su “Duo Comè” e sa mùsica medievale de su duo “Non a suo Amante”.
Su 29 de cabudanni, in su Museu diotzesanu arborensu, ddoe at a èssere sa de duas rassignas, chi at a acabbare comente a semper cun su cuntzertu gospel de su 23 de su mese de Nadale.
Si cumentzat cun sa mùsica de càmera de is chimbe arcos “I Virtuosi di San Severo”; su “Trio Armonica Danza delle Muse”; su pianista Roberto Piana e una cambarada de su Cunservatòriu de Casteddu.
Si ddoe atzunghent is càntigos de sa soprana Ilaria Vanacore e de su pianista Marco Schirru; su “Duo Romantico” cun Reinhard Seehafer cun su pianoforte e Gernot Sussmuth cun su violinu; su pianista Edoardo Mancini e su “Trio Ellipsis”.
Sa rassigna at a acabbare cun sa cambarada de su Cunservatòriu de Tàtari; su recital pro chiterra de Raffaele Putzolu e su cuntzertu dedicadu a Monteversi, cun Fabio Frigato cun s’òrganu, sa soprana Valentina Satta e Ettore Agati, contra-tenore.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
