Novas Aristanesas, mèrcuris 5 de làmpadas de su 2024
Sa butàriga de Crabas in is mègius ristorantes de su mundu – Su de nche portare sa botàriga de Crabas a is mègius ristorantes natzionales e internatzionales. Custa est sa tarea de sa Bussighedda internatzionale de sa botàriga chi ant cuncordadu in Crabas in ocasione de s’addòbiu “ Sa botàriga de is istànios de Crabas”, cun su Tzentru pro is servìtzios de promovimentu de sa Càmera de Cummèrtziu de Casteddu e de Aristanis e finantziadu dae sa Regione.
Intra de is invitados ddoe fiant unos 50 comporadores, deghe de custos chi arribaiant dae s’èsteru, a manera particulare dae Germània e Danimarca.
S’addòbiu, nàschidu cun sa collaboratzione de su Cunsòrtziu Pontis e de sa cooperativa Piscadores e molluschicultores Mistras, punnaiat a avalorare su produsimentu chi dae sèculos e sèculos traballant in s’istàniu de Crabas e a favorèssere s’addòbiu intra de sa domanda e s’oferta de is produsidores crabarissos, pro agiudare sa presèntzia de sa botàriga in is mercados, prus che totu de s’èsteru, in ue est prus biatzu s’atentu e s’interessu de is consumadores pro su “caviale” sardu.
In bidriera ddoe fiat sa botàriga prus bella de su pische de Pontis. Su chi at mustradu e at fatu tastare a is comporadores furisteris custa licania de Crabas est istadu su contadore Davide Rampello.
A s’addòbiu ddoe ant pigadu parte Nando Faedda, vitze-presidente de sa Càmera de Cummèrtziu de Casteddu-Aristanis, e su sìndigu de Crabas, Andrea Abis, pro is saludos istitutzionales.
Ant fatu fintzas una passigiada peri is paesàgios e s’istòria de sa Pischera de Mar’’e Pontis, tastende màndigos cun botàriga e àteru pische de is istànios de Crabas. Ma ddoe fiant fintzas paradas cun mustras de àteros produsimentos de sa provìntzia de Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
