Sa provìntzia de Aristanis acasàgiat a is artesanos de totu s’Ìsula – S’artesania sarda de calidade est torra protagonista in duas de is mègius bidrieras prus nòdidas in Sardigna: sa de Mòguru e sa de Samugheo. Ambas duas is biddas ant a acasagiare is mustras de is cosas criadas dae is artesanos e dae is artistas de totu sa Sardigna.
In Mòguru cumentzat sa de 63 editziones de sa Fiera de s’artesania artìstica de Sardigna, chi at a èssere aberta pro su pùblicu dae cras sàbadu 27 de trìulas e at a abarrare aberta fintzas a su 22 de cabudanni. Acasagiada in su fràigu istòricu de pratza de is Màrtires de sa Libertade, sa fiera ocannu tenet a tema “Sa memòria de su tempus”. In custa editzione sunt 107 – contados fintzas is operadores de s’agrualimentare – is artistas e artesanos chi pro agiomai duos meses ant a mustrare is fainas issoro in Mòguru, cun cunfirmas meda de artesanos “istòricos” e calicuna presèntzia noa. Ocannu puru ddoe est su billete ùnicu chi ponet paris sa bìsita a sa Fiera cun cussa a is logos culturales e museos de su territòriu.
Intra de is novas, sa presèntzia, in una parada, de s’Acadèmia de Mùsica Sarda, criada dae Simone Grussu, moguresu, nàschida pro avalorare a is sonadores e cantadores, paris cun su repertòriu de sa mùsica de su connotu sardu e s’artesania musicale professionale. In programma fintzas àteros addòbios pensados pro sa comunidade e pro is bisitadores istràngios, comente a su fèstival “Pedras et Sonos”.
Ma mancat pagu fintzas pro s’editzione 2024 de “Tessìngiu” chi si faghet in sa sea de su Museu ùnicu regionale de s’arte de su tessìngiu, su M.U.R.A.T.S. de Samugheo. Est sa sea istòrica, abbandonada in su 2017 – cando aiat acasagiadu sa de 50 editziones – e chi aiat tramudadu a su fràigu de sa cantina sotziale betza de sa bidda.
E immoe, imbetzes, su Museu ùnicu regionale de s’arte de su tessìngiu si preparat a acasagiare pro chimbe chidas custa bidriera manna de s’arte de su tessìngiu sardu, ma acasàgiat fintzas setziones dedicadas a àteros materiales. Su nastru de abertura dd’ant a segare sàbadu 3 de austu. Sa mustra at a abarrare aberta fintzas a s’8 de su mese de cabudanni.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
