Una coa de chida rica de addòbios in provìntzia de Aristanis – Custa puru at a essi un’àtera coa de chida rica meda de addòbios in provìntzia de Aristanis, intra de cultura, mùsica e traditziones, In Mòguru, cenàbura, aberit sa de 63 editziones de sa Fiera de s’artesania artìstica de sa Sardigna. Sa fiera, chi at a abarrare aberta fintzas a su 22 de cabudanni, dd’acasàgiat su fràigu de pratza de is Màrtires de sa Libertade e, ocannu, sighit su tema “Sa memòria de su tempus”.
In Masuddas, imbetzes, est totu prontu pro pro sa festa cuncordada de s’assòtziu “Faeus festa”, intra de mùsica e mandiares bonos, cun sa de 6 editziones de sa sagra de su porcu arrostidu. S’apuntamentu est pro sàbadu in pratza de Sepulveda.
In Aristanis sighit su Dromos Fèstival: sàbadu is rifletores ddos ant a puntare a unu de is rapresentantes prus de importu de su jazz europeu de is ùrtimos chimbanta annos: in su palcu de pratza de sa Sea, difatis, ddoe at a èssere su sassofonista norvegesu Jan Garbarek. Sa die a pustis, semper in cue etotu, tocat a sa cantante maliana Fatoumata Diawara, una de is rapresentantes prus biatzas de s’iscena musicale africana. Sàbadu a merie mùsica fintzas in arborada de Repùblica, cun sa de 13 editziones de Rock in Contea. A su palcu ddoe ant a artziare is “After Midnight 00.01”, “R.I.O.S.” e “Whisper Of A White Bullet”.
In Turre Manna, imbetzes, ddoe est Stardog, s’isfilada de canes asuta de is isteddos in programma chenàbura 26 de trìulas. Sa faina dda presentat Michele Piras, mentras sa diretzione artìstica est de Daniele Pinna.
In Santu Lussurzu, domìnigu, sighit sa rassigna “A Cappella: Hymnos addòbiat is polifonias de su Mediterràneu”. Is cantadores de Su cuncordu de sos Zovanos de su rosàriu de Santu Lussurzu e su tenore Ususule de Thiniscole ant a addobiare a is Giòvanos Cantadores de Sant’Olcese, rapresentantes de importu de su connotu de su trallalero genovesu.
In fines, in Crabas, chenàbura e sàbadu in pratza de s’Istàniu, ddoe faghent sa Sagra de su pische pòberu cuncordada dae is comitados pro Santu Sarvadore 2024 e Santa Maria 2025.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
