Sos addòbios in contu de sa situatzione de sa sanidade – Paret chi non si chèrgiat firmare sa crisi sanitària chi pertocat sos ispidales e sos servìtzios de base de sa provìntzia de Aristanis, tantu chi comunidades e amministratziones pedint s’interventu de sa Regione pro firmare s’emergèntzia.
Pro custa chida fiant in programma duos addòbios de importu: sa riunione de sos sìndigos chi sunt a capu de sos distretos sanitàrios oe, 4 de trìulas, e s’addòbiu in Prefetura cun s’assessore regionale a sa Sanidade Armando Bartolazzi, cras 5 de trìulas.
In s’addòbiu issoro sos sìndigos ant iscritu una filera de preguntas, dadas a s’assessore de sa Giunta Todde.
Si partit dae s’ativatzione, de fàghere luego, de totu sas protzeduras chi cunsentant de cramare mèigos de base e pediatras pro sas sedes vacantes; s’acreschimentu e sa garantzia de sos Ascot pro su 2024 finas a cando non at a èssere garantida sa cobertura de sas sedes vacantes de sos mèigos de base e su nche torrare a su servìtziu a base volontària de sos mèigos in pensione cun sa possibilidade de impreare sos retzetàrios pro sas prescritziones mèigas.
Si sighit cun s’afortigamentu de sa guàrdia mèdica e de sos orgànicos de s’ispidale, pro incurtzare sas listas de isetu; s’islonghiamentu de sa valididade de sas prescritziones mèigas pro sos pranos terapèuticos e s’impreu in su servìtziu tzivile de sos mèigos de sas Fortzas armadas.
No est mancada mancu sa rechesta de b’àere prus comunicatzione intre sas istitutziones: sos sìndigos in fatis ant apretadu sa Regione a fàghere un’addòbiu in assessoradu pro s’esame pretzisu de totu sas dificultades de su territòriu.
In s’addòbiu s’assessore Bartolazzi at a cunfirmare s’impignu de sa Giunta a risòlvere sos problemas, mancari s’emergèntzia isparta in totu s’Ìsula non si potzat risòlvere luego cun remèdios de agatare in presse.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
