Duos traballos de importu in Santu Giuanne de Sinis – Pertocant sa seguresa e sa bellesa is ùrtimos traballos fatos in Santu Giuanne de Sinis. Su 21 de làmpadas sunt acabados is traballos de ponidura in seguresa de su fronte de rocas in unu tretu de sa praja de Santu Giuanne, traballos chi fiant cumentzados su 4 de su mese de làmpadas a pustis chi fiant unos cantos annos firmos.
Su fronte de rocas dd’aiant postu in seguresa a pustis de un’ordinàntzia de su sìndigu Andrea Abis de su 24 de maju, in ue su primu tzitadinu sutaliniaiat sa perigulosidade de su logu, giai decrarada cun un’ordinàntzia de su 2018, cando sa prima Giunta ghiada dae Abis si fiat aposentada in Comune. S’arriscu fiat chi cantos mannos de roca nche esserent rutos a sa praja, pro more de su fenòmenu naturale de isfaghimentu de sa pedra.
Sa faina de ponidura in seguresa dd’at contivigiada una dita ispetzializada, traballende siat a manu siat cun s’impreu de mezos mecànicos.
Ma in Santu Giuanne est mudada fintzas sa bisura de sa bia chi portat a s’àrea archeològica de Tharros: su caminu, abertu su 20 de làmpadas, dd’ant torradu a fàghere cun unu pamentu naturale nou chi respetat s’ambiente.
Su progetu, bòfidu dae s’Amministratzione comunale, est prus respetosu de is piessignos de cussos logos: su pamentu est de arena chi, a fortza de ddoe passare, s’at a atiddire. Su cantieri de assentu de sa bia est abarradu abertu tres dies, dae su 17 a su 19 de làmpadas.
In custas dies imbenientes, imbetzes, ddoe ant a cuncordare un’impiantu nou de illuminatzione pùblica, mentras giai ocannu passadu aiant cuncordadu iscaleras de linna pro chi esseret prus discansosu a arribare a sa praja.
Megiorat, duncas, sa possibilidade de gosare de custu logu de mare in custa simana de istadiale, in ue in Santu Giuanne si biet – giai dae unas cantas chidas – sa presèntzia de turistas meda.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
