Sos cussìgios pro parare fronte a sa basca de sas dies chi benint – Sas dies chi benint in sa provìntzia at a fàghere basca meda: s’anticiclone africanu Caronte est imbàtidu finas a sa provìntzia de Aristanis, cun sas dies bellas de istiu caraterìsticas suas, chi finas a finire sa chida nch’ant a fàghere pigare sa temperadura a prus de 30 grados.
Comente onni annu su Ministeru de sa Salude at publicadu unu vademecum cumbeniosu pro parare fronte a su caldu in manera segura. Si movet dae su primu cussìgiu, chi narat de no essire in sas oras prus caldas de sa die, est a nàrrere dae sas 11 a sas 6 de sero.
Mègius a si pònnere roba lèbia, no astrinta e chi fatzat passare s’ària, mègius in fibras naturales. Siat in su traballu siat in domo est cosa bona a oscurare sas ventanas cun serrandas o tendas in sas oras prus caldas, aberende in cussas prus friscas.
Su cunditzionadore est un’agiudu mannu, ma cheret impostadu intre sos 24 e sos 26 grados.
Pro abbacare sa temperadura de su carenadu mègius a fàghere bànnios o dòcias cun abba tèbia e a s’infùndere sa cara e sos bratzos. Finas s’atividade fìsica cheret minimada e fata ebbia in sas oras prus friscas.
S’alimentatzione tenet importàntzia manna: est cosa bona a si bufare 2 lìteros de abba a sa die, a mandigare cosa lèbia e frisca e a prefèrrere frùtora e berdura o alimentos chi nde cuntenent. Su màndigu non devet abarrare foras dae su frigorìferu prus de duas oras e tocat a dare atentu a comente si custoint sas meighinas, ca su prus non si podet lassare a temperaduras chi nche colent sos 25-30 grados.
Tocat a dare atentu finas cando si biàgiat in vetura, màssimu si fiat ora meda in su sole. In antis de mòvere est mègius a abèrrere sas ventaneddas o a allumare s’ària cunditzionada.
In ùrtimu tocat a dare atentu mannu a sa gente in dificultade, màssimu si bivet a sa sola, signalende a sos dotores e a sos servìtzios sotziales cando tenent mala gana o b’at situatziones de perìgulu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
