Unu mese de trìulas de donatziones in provìntzia – S’importu de donare non si firmat mancu in s’istiu, antzis. Est pròpiu custu su momentu de èssere prus generosos cun sas donatziones pro agiudare sos àteros.
Prus che totu in s’istiu, mìnimant sas donatziones de sàmbene ma sos malàidos talassèmicos e oncològicos devent fàghere sas trasfusiones su matessi.
Non solu, semper in custu tempus, in s’Ìsula sa populatzione est a dòpiu cun s’arrivu de turistas e nch’at prus intzidentes istradales.
Pro totu custas resones in custas chidas tocat de donare ancora de prus. S’apellu pretzisu a donare est ammentadu fintzas dae su dutore Mauro Murgia, responsàbile de su tzentru trasfusionale de s’ispidale San Martino de Aristanis, chi invitat sa comunidade a leare parte a sas 14 dies de regorta de su sàmbene organizadas dae s’Avis Provintziale paris cun sas sedes locales de su matessi sòtziu in programma pro totu su mese de trìulas.
Sos volontàrios de sas setziones locales de s’Avis de totu sa provìntzia ant a èssere impignados pro organizare sa regorta de sacas de sàmbene in sas sedes issoro. Aco’ sos apuntamentos chi b’ant a èssere dae inoghe a pagas dies: sàbadu chi benit, 6 de trìulas, in Mòguro e domìniga 7 de trìulas in Terraba. A pustis chenàbura 12 de trìulas in Santu Lussùrgiu, sàbadu 13 in Sèdilo, domìniga 14 in Marrùbiu e Santeru, lunis 15 in Bosa, sàbadu 20 in Paulle e domìniga 21 de trìulas in Terraba e Arcidanu. In fines, chenàbura 26 de trìulas in Ilartzi, sàbadu 27 in Fordongianus e domìniga 28 de trìulas in Milis e Arborea.
Chie cheret donare su sàmbene in Aristanis si podet presentare dae su lunis a su sàbadu, dae sas 8 a mesudie, in su tzentru trasfusionale de s’ispidale San Martino. Non serbit sa presentatzione.
“In sa sede nostra ebbia”, narat dutore Murgia, “podimus bogare dae sa matessi saca fintzas un’unidade de piastrinas chi serbint pro sos malàidos oncoematològicos”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
