Contras de s’eòlicu in su portu de Santa Justa-Aristanis – Su portu de Santa Justa-Aristanis s’est furriadu a èssere su logu de sa chèscia manna contras de is ispeculatziones energèticas in s’Ìsula nostra. Giai dae sa coa de chida passada una cambarada de manifestadores nd’at istantargiadu unu presìdiu in su portu, faghende lòmpere ativistas dae totu sa Sardigna, prontos a sighire sa chèscia contras de is progetos de impiantos eòlicos.
Sa punna de is manifestadores est resurtada crara giai dae luegos: firmare sa mòvida de is palas eòlicas chi sunt arribadas a su portu in su mese de abrile e chi diant dèpere serbire pro unos cantos impiantos de su Cabu de Giosso de s’Ìsula.
Me in is social gente meda s’est mustrada de acòrdiu cun sa chèscia e su presìdiu dd’at bisitadu fintzas su sìndigu de Aristanis, Massimiliano Sanna.
In contu de sa chèscia, in prus, est intervènnidu su prefetu Salvatore Angieri: “Invito totu is partes in giogu a fàghere a manera chi siat una chèscia tzivile, respetende siat su diritu a sa libertade de espressada siat is diritos de is àteros e de s’initziativa econòmica”.
Sa chèscia s’est abbiatzada sa note intra de su 15 e su 16 de trìulas, cando unu mezu ispetziale at proadu a mòvere dae su portu cun is palas eòlicas. Is manifestadores ant serradu sa bia, refudende-si de si transire e intonende càntigos de chèscia.
A su portu ddoe sunt curtos is Carabineris e sa Politzia, chi ant proadu a pònnere òrdine in sa manifestatzione. A pustis de unas cantas oras, is manifestadores ant detzìdidu de si transire e de lassare passare su mezu ispetziale cun sa pala. Ma, mancari nd’apant fatu essire s’autoarticuladu, ant comente si siat cunsideradu sa chèscia una bìnchida e ant consigiadu de no organizare su tramudu de is àteras palas.
“Est crara sa voluntade de Roma de bòlere isfrutare is terras nostras sena de profetu perunu pro su pòpulu sardu”, narant is ativistas. “Amus a sighire a bardiare su logu nostru e a si chesciare contras de cale si siat forma de ispeculatzione noghidora”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
