Novas Aristanesas, mèrcuris 31 de mese de argiolas de su 2024
Emergèntzia in s’istàniu de Marceddì – Diat a pàrrere lòmpida a una solutzione sa situatzione de emergèntzia chi su Consòrtziu de pisca de Marceddì at marcadu: a pustis de is rebellias e de is sinnalatziones meda in contu de s’ossigenatzione non bastante de sa laguna, chi at portadu a sa morte de unu muntone de pische, dae sa Regione ant a arribbare is finantziamentos pro sas lagunas de sa provìntzia de Aristanis, dinari chi at a pòdere torrare a agiudare su setore.
Unu de is problemas chi su Consòrtziu at marcadu, dd’at sinnaladu su 12 de su mese de trìulas passadu. Pro sa de duas bortas in unu mese, in s’istàniu de Corru S’Ittiri s’Asl at firmadu sa pisca pro more de is livellos artos de incuinamentu. S’incràs s’ispigru de abba de Santu Giuanne at connotu sa morte de unu muntone de pische, càvuru e crostàtzeos.
Su presidente de su Cunsòrtziu, Antonio Loi, at imputadu su problema a s’ossigenatzione tropu lèbia de sa laguna etotu, pro ite est mancada s’abertura de is intradas de su ponte de Marceddì e pro ite su canale 17, logu de acàpiu cun su mare, fiat pagu pulidu e non dd’aiant fatu sa manutentzione.
Su Cunsòrtziu, a pustis de àere firmadu impare a is àteras cooperativas una lìtera indiritzada a sa Regione, at annuntziadu una mobilitatzione pro punnare a serrare su ponte de Marceddì: sa chèscia dd’ant fata su 25 de su mese de trìulas e fiat durada pagu oras, pro ite sa Regione aiat asseguradu chi at a mandare a is tècnicos pro averiguare.
Su Cunsòrtziu de bonìfica at a programmare is fainas me in is canales, impreende su dinari regionale: 6 milliones de èuros pro su triènniu 2024-2026. “Amus a intregare custas resursas con unu emendamentu a s’assentu de su bilàntziu”, at ispiegadu su presidente de sa Cummissione Fainas produsidoras Antonio Solinas.
A pustis de unu controllu nou, chi is tècnicos de s’Assessoradu regionale e de s’Agricoltura e de su Cunsòrtziu de Bonìfica aristanesu ant fatu, a is piscadores no abarrat àteru chi no abetare chi sa màchina regionale si pòngiat in motu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
