Sa provìntzia de Aristanis presada meda pro is atletas olìmpicos suos – S’11 de austu sunt acabbados is Giogos de sa de 33 Olimpìades de Parigi, intra de emotziones e garas malas a iscarèscere. Intra de is protagonistas fintzas is atletas de sa provìntzia de Aristanis, chi nche sunt renèssidos a incungiare resurtados de importu.
Stefano Oppo nd’at boddidu una medàllia de prata: su carabineri, 29 annos, de Aristanis, nch’est artziadu a su de duos iscaleris de su palcu de is pesos lèbios addopiados maschiles, paris cun su cumpàngiu de echipàgiu Gabriel Soares. Su 2 de austu ant fatu a trivas in sa finale in Vaires-sur-Marne, faghende lòmpere s’Itàlia in su de duos postos, a palas de s’Irlanda e in dae in antis de sa Grètzia. In custa ispetzialidade, chi est s’ùrtima borta chi dd’ant a pònnere in is Giogos olìmpicos, sa medàllia de prata mancaiat a s’Itàlia dae 24 annos.
E Alessia Orro, de Narabuia, chi s’11 de austu at bintu sa medàllia de oro cun s’iscuadra de pallavolo feminile, intrende aici in s’istòria de su volley italianu: difatis, est sa prima borta chi s’iscuadra asula nche àrtziat a s’iscaleri prus artu de una cumpetitzione olìmpica. Is italianas ant giogadu una partida istravanada, binchende contras de s’iscuadra de is Istados Aunidos de Amèrica cun su puntègiu de 3 set a 0, mustrende una fortza prus manna e unu giogu prus atzivu de is aversàrias.
Ma una figura bella dd’at fata fintzas Lorenzo Patta, de Aristanis, mancari siat arribadu in su de bator postos a tretu de apenas 7 tzentèsimos dae su brunzu in sa triva 4×100 curta su 9 de austu. In s’iscaleri prus artu ddoe sunt artziados is curridores de su Cànada, cun 37’’50, in dae in antis de su Sud Àfrica (37’’57) e de sa Gran Bretànnia (37’’61). A suta de s’abba de Parigi (difatis fiat proende), s’Itàlia, chi curriat in sa de duas corsias, at firmadu su cronòmetru a 37’’68. Tres annos a oe, in is Olimpìades de Tokyo, fiat arribadu s’oro asulu, cun 37’’50.
Sa die in antis, imbetzes, Sergio Massidda, de Ilartzi, non nch’est renèssidu a acabbare sa triva cun s’istrapu pro s’artziada de is pesos. S’atleta tenet però 22 isceti e unu donu mannu: de seguru at a fàghere bàlere s’abilesa sua in àteras ocasiones de importu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
