Novas Aristanesas, chenàbura 30 de austu de su 2024
Is campiones de s’ecuitatzione faghent a triva in Arborea – Arborea si preparat pro acasagiare su Sardigna Endurance Fèstival chi s’at a fàghere dae su 26 a su 29 de cabudanni in s’Horse Country Resort. A tretu de unu mese sunt giai lòmpidas a is organizadores dosinas de iscritziones dae parte de cambaradas internatzionales pro pigare parte a su “FEI Endurance European Championship for Young Riders & Juniors”, is europeos de Endurance pro cadderis giòvanos e pro pitzocheddos, e a su “FEI Endurance World Championship for Young Horses”, su campionadu mundiale de Endurance dedicadu a is caddos giòvanos, chi tenent prus pagu de oto annos.
Is trivas ddas ant a fàghere in is 120 chilòmetros de caminu intra de is sartos de Arborea e de Terraba, peri opinedos e zonas ùmidas, prados e tretos cun matedu mediterràneu, prajas e sa borgata de Marceddì, in unu paesàgiu ammajadore.
A custa manifestatzione de importu dd’agiudat sa Federatzione ecuestre internatzionale e, ocannu, at a pòdere gosare de is patrotzìnios de tres ministeros: su de su Turismu; su de s’Ambiente e de sa Seguresa energètica; de s’Agricultura, de sa Sovranidade alimentare e de is Padentes.
Ma custu apuntamentu isportivu gosat fintzas de su patrotzìniu de sa Regione Autònoma de Sardigna, de s’Agentzia Forestas, de is Comunes de Arborea e de Terraba, de su Coni natzionale e de sa Federatzione italiana de is isport a caddu.
In fines, abetende sa de 126 editziones de fiera cavalli de Verona, dae su 7 a su 10 de onniasantu, s’Horse Country Resort at a acasagiare dae oe a domìnigu 1 de cabudanni is trivas pro su “Prèmiu regionale de su tzircùitu Foals”, dedicadas a is puddedros e a is puddedras de unu e duos annos.
Sa cumpetitzione, chi balet pro pòdere pigare parte a s’addòbiu de Verona, at a acabbare in sa prima coa de chida de santugaine cun is finales regionales de is puddedros (mascros e fèminas) de tres annos. Custas rassignas ddas contivìgiant su Tzìrculu ìpicu Grighine ASD e su Tzìrculu ìpicu Usignolo ASD.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
