In provìntzia de Aristanis su mese de austu cumentzat cun una filera longa de apuntamentos – Màndigos de su connotu, traditzione, mùsica: sunt medas is apuntamentos in provìntzia de Aristanis in custa coa de chida. In Mragaxori, comente a ònnia annu, torrant a avalorare una de is genias de pasta prus nòdida de s’Ìsula cun sa “Sagra de is lorighitas”. Sàbadu e domìnigu ddoe est sa de XXVIII editziones de sa sagra, cun tastaduras, addòbios de su Dromos Fèstival e cun unu calendàriu ricu chi at a permìtere de iscobèrrere is bellesas de custa bidda de Monti Arci.
In Samugheo sàbadu cumentzat “Tessìngiu”, sa mustra cuncordada in is locales de su Murats e chi at a abarrare aberta ocannu chimbe chidas, fintzas a s’8 de cabudanni.
In Narabuia semper sàbadu ddoe cuncordant “Saboris antigus”, cun is màndigos de su connotu, in su tzentru polifuntzionale “Peppino Pippia”, in pratza de Antonio Segni. Sighende cun is mandiares de su connotu, sàbadu in Siamanna ddoe est sa de 26 editziones de sa “Sagra de is culurgionis”, cun mùsica, mustra de tratores antigos e unu muntone de àteras cosas. Frùmenes de birra, mandiares bonos e mùsica bella fintzas a parte de chitzi in Turre Manna, in ue ddoe faghent sa de tres editziones de su “Sardinia Beer Fèstival”, dae chenàbura a domìnigu.
In Santa Justa imbetzes, chenàbura a merie, ddoe est sa presentada de 14 ghias turìsticas noas in contu de is itineràrios de su Romànicu in Sardigna, in dae in antis de sa Basìlica. Is ghias s’ant a pòdere agatare fintzas in is aeroportos de Terranoa e de s’Alighera. In Bàini torrant a fàghere sa rassigna “Bisiones sardas”. Su tzìnema giòvanu sardu at a abbiatzare sa note de chenàbura cun projetziones in logu abertu cuncordadas dae sa Biblioteca comunale “Antoni Cuccu”.
In Aristanis s’abbiatzat sa festa de Santa Crara. Dae chenàbura e fintzas a su 9 de austu apuntamentu cun sa novena e cun sa missa, a is noe oras de note, in sa crèsia de Santa Crara. In Fordongianus, sàbadu, ddoe ant a fàghere is premiatziones de sa de 30 editziones de su “Simpòsiu internatzionale de iscultura in pedra bia”. In fines, in Crabas sàbadu e domìnigu ddoe at a àere àteros apuntamentos de istadiale cun sa rassigna literària e corale “Is gigantes” de Crabas.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
