Novas Aristanesas, giòbia 22 de austu de su 2024
Sa coa de chida in provìntzia de Aristanis – Sunt medas is addòbios in provìntzia de Aristanis in custa coa de chida. In Santa Justa ddoe faghent sa Regata de is fassonis: sàbadu, a is chimbe de merie, ddoe est s’addòbiu culturale “Othos”, in su tzentru Logu Abertu. Sa die a pustis sa festa s’abbiatzat: a is 9.30 de mangianu dae pratza de su Comune at a mòvere s’isfilada de is fassoneris, cun is cambaradas cun sa bestimenta de su connotu, mentras a is 10.30 ant a cumentzare is trivas de sa regata. Sa Regata dda cuncordant su Comune de Santa Justa, sa Pro Loco, s’assòtziu de “Is fassoneris” e sa Cooperativa de is piscadores de Santa Justa.
A Cùglieri ddoe torrat su tzìnema in logu abertu cun sa projetzione de su film de Paolo Zucca “Vangèliu segundu Maria”, custu meritzeddu in S’Architu, mentras in Mòguru sàbadu acabbat sa de 7 editziones de “Pedras et Sonos Jazz Fèstival”, s’apuntamentu musicale itinerante prus de importu de sa Marmidda e de su Parte Montis.
Culurzones e ‘ortau: Ardaule presentat in mesa is produsimentos suos sintzillos e afestat is 40 annos de s’assòtziu “Santu Chìrigu”: chenàbura a merie baddos in pratza e, a pustis, discoteca cun su dj Succu. S’incràs, “Sa note de s’izadorzu”: sa sagra de is culurzones e de su ‘ortau, cun mùsica e baddos in pratza cun sa cambarada de is “Ballade, ballade bois” ghiada dae Carlo Boeddu.
In Àllai, a pees de Monte Grìghini, ddoe est sa de VI editziones de su Fèstival “Palcoscenici d’Estate”, cun “Ti tiru una fotografia” de e cun Renzo Cugis e Lele Pittoni, chenàbura 23 de austu, a is deghe de note, in pratza de Santu Sidoru, mentras sa die in fatu ddoe cuncordant s’isfilada de moda de s’istilista Natalia Plamadeala.
In Simaghis, sàbadu a merie, in largu de Carlo Felice, ddoe faghent sa de ses editziones de sa Festa de su Turista, a is oto de merie, cun sa chena e cun mùsica bella. Dda cuncordant sa Pro Loco de Simaghis e su Comitadu de Santu Atzei – classe 1975, cun s’agiudu de su Comune.
In fines, in Aristanis, fintzas a sàbadu s’at a pòdere bìere sa de tres editziones de “Isparghiduras Fèstival” in s’Hospitalis Sancti Antoni, ma cun apuntamentos fintzas in Mandriola e in Arborea. In Crabas, imbetzes, chenàbura a sero cumentzat sa festa religiosa e tzivile in onore de Santu Sarvadore, abetende sa Currera de is iscurtzos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
