Novas Aristanesas, giòbia 8 de austu de su 2024
Is addòbios de custa coa de chida – Sunt medas is addòbios custa coa de chida in provìntzia de Aristanis. Cultura, traditzione, e ispàssiu pro su Carrasegare de s’istadiale de Fordongianus.
S’addòbiu s’at a fàghere domìniga sero, a incuru de sa Pro loco, cun sos grupos folk, ma a prus de custos, s’ant a pòdere tastare is prodùsios tìpicos de su logu e s’ant a pòdere fàghere bìsitas a is Termas Romanas a sa Domo Aragonesa. Semper in sa matessi bidda, sàbudu e domìniga nche at su Dromos Fèstival: duas dies oru oru de su frùmene Tirsu cun su Termas Romanas Fèstival. Chenàbura sero, est su turnu de su cumposidore, polistrumentista e producer Doom Cannon; a sighire at a tocare a su tubista Theon Cross. Sàbudu sero, imbetzes, su Blue Lab Beats, una cambarada formada dae duos artistas de jazztrònica e, a pustis, is C’mon Tigre. In ambas duas is seradas, sa mùsica at a durare finas a note manna gràtzias a is seberos de Dj Knuf.
Me in s’opinedu de Mandriola, in sa marina de Santeru, pro su chi pertocat sa rassigna Altrimari, chenàbura sero ddoe at a èssere Vanessa Roggeri chi presentat “Su furone de is carrabusos”. S’incras, in sa praja de Putzu Idu, a mangianu ddoe est sa Velegiada sotziale de Santu Larentu.
Pro su chi pertocat is Mustras, in Samugheo, in sa coa de chida puru, s’at a pòdere bisitare sa de 57 editziones de Tessìngiu, in su Murats, chi s’at a pòdere bisitare finas a s’8 de su mese de cabudanni. In Mòguru, imbetzes, ddoe est sa Fiera de s’artigianadu artìsticu, inchìngiada su 26 de su mese de trìulas passadu e chi s’at a pòdere bisitare fintzas a su 22 de su matessi mese. In programma unu muntone de àteros addòbios a costàgiu: su primu at a èssere sa chenàbura sero, in sa lògia, anca s’ant a esibire artistas, pro mèdiu de s’Acadèmia de Mùsica Sarda, cun ainas musicales artesanales.
A Aristanis torrat sa Sartigliedda de Istadiale 2024 chi at cuncordadu sa Pro loco e in programma domìniga sero in Turri Manna, mentras in Cabras, in pratza de Lionora, sàbudu s’at a fàghere su primu addòbiu de su cuncursu musicale Istellas de Sinis, cuncursu in chirca de talentos de su cantu. A Marrùbiu torrant is atmosferas de Carrasegare cun unu festa in pratza e in cumpangia de is grupos a fatzolas de su Terrabesu, giogos de abba e sarfatas de tzìpulas.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
