Novas dae sa sanidade aristanesa – In s’ambulatòriu de Bonàrcadu, in ue sena de cunditzionadore s’arribat fintzas a 38 grados, ddoe at tropu basca. Pro cussu Annalisa Mele, sìndigu e mèigu de base in bidda sua, pro amparare sa salude de is malàidos, in is dies passadas at detzìdidu de retzire a is patzientes in is oras prus friscas, est a nàrrere dae is sete de merie a is deghe de note, dae su lunis a sa giòbia.
“Una situatzione de suferèntzia e de perìgulu chi non si podet suportare”, at decraradu Mele, chi giai in s’istadiale passadu aiat sinnaladu su problema a sa Asl. “Nche at passadu un’annu e, a dolu mannu, sa situatzione no est mudada”, at naradu.
Sa diretzione de sa Asl 5 de Aristanis, a pustis de is sinnalatziones fatas dae su presidente de s’Òrdine de is mèigos de sa provìntzia de Aristanis in contu de s’ambulatòriu de Bonàrcadu, regordat chi, in s’ùrtimu annu e mesu, sa sienda at investidu 3 milliones e 400 mìgia èuros pro interventos de contivìgiu in is istruturas sanitàrias cosa sua e, de custos, 1 millione e 400 mìgia èuros pro cuncordare impiantos noos de climatizatzione o pro acontzare is impiantos betzos.
Su diretore generale, dotore Serusi, sutalìniat s’impignu de sa sienda in su intervènnere pighende in cunsideru totu is bisòngios de su territòriu. Su manager at naradu puru chi “lassat a buca aberta su connòschere su parre de dotora Mele, chi narat chi is dotores de base si-nche fuent dae is biddas de a intro de sa Sardigna pro ite ca non ddoe at impiantos de climatizatzione, mancari serbant. Un’idea tropu simpre, epuru issa est istada fintzas consigiera regionale, impignada pro connòschere su pro ite de is fartas meda in sa meighina de base in Sardigna e in is cussòrgias de a intro. A custos problemas sa Asl nostra ddis at paradu fronte cun su progetu-pilota de is ASCoT, chi pro como sunt s’ùnicu remèdiu a livellu regionale pro custu problema”, acabbat dotore Serusi.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
