Novas Aristanesas, lunis 26 de austu de su 2024
Is festas de sa fide in provìntzia – S’annoat ocannu puru s’apuntamentu cun duas de is festas religiosas prus abetadas e apretziadas dae sa comunidade: sa festa de Nostra Sennora de su Remèdiu e cussa de Santu Frannàtziu de Làconi.
Sa festa religiosa pro Nostra Sennora de su Remèdiu, patrona de s’Artzidiòtzesi de Aristanis, est cumentzada sàbadu. A pustis de sa Peregrinatio Mariae de domìnigu, cun sa mòvida dae Bonàrcadu passende peri Milis, Tramatza, Santeru, Tzeddiani e Màssama, s’istàtua de Nostra Sennora at a torrare a sa Basìlica de su Remèdiu mèrcuris 28 de austu, die de cumentzu fintzas de is novenas in programma fintzas a su 6 de cabudanni. Sa festa s’at a abbiatzare sàbadu 7 de cabudanni cun sa Solennidade de Nostra Sennora de su Remèdiu e sa die in fatu, cun sa festa populare.
Lunis 9 de cabudanni, imbetzes, ant a fàghere sa festa de Maria Vìrgine Biada e ant a fàghere sa missa pro is malàidos, chi at a cumentzare a is chimbe de merie. Martis 10 de cabudanni, a is sete de merie, s’istàtua de Nostra Sennora at a tramudare a Sèneghe. Sa Peregrinatio Mariae at a passare peri Narabuia, Arriora, Boàtiri, Nurachi e Solanas. In fines, chenàbura 13 de cabudanni, a is oto de merie, una fiacolada at a acumpangiare s’istàtua de Nostra Sennora cara a sa Basìlica sua de su Remèdiu, in ue dd’ant a torrare a pònnere in su nìciu suo, faina chi inditat s’acabbu de sa festa.
Su 29, 30 e 31 de austu, imbetzes, sunt is dies de sa festa de Santu Frannàtziu de Làconi: ant a èssere tres dies dedicadas a sa fide e a sa devotzione, ma ddoe ant a èssere fintzas ispetàculos meda gràtzias a unu programma ricu de addòbios tziviles. Is apuntamentos religiosos sunt cumentzados mèrcuris passadu e ant a sighire fintzas a sàbadu 31 de austu. Pro su chi pertocat, imbetzes, sa festa tzivile, at a cumentzare giòbia 29 cun sa prufessone de su santu, a ue ddoe ant a pigare parte is cambaradas folk, caddos, cadderis e sonadores de Sardigna, e cun sa Rassigna regionale de su folklore.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
