Novas Aristanesas, martis 6 de austu de su 2024
Sa chèscia contras de s’eòlicu sighit – Mancari su presìdiu in su portu de Aristanis – Santa Justa dd’apant proibidu, sighit in provìntzia de Aristanis sa chèscia contras de s’ispeculatzione energètica e su cuncordu in totue de is impiantos eòlicos.
Su 29 de su mese de argiolas is ativistas ant pigadu parte a sa manifestatzione cuncordada dae su comitadu Ajò stop degòlliu, in S’Architu, pro nàrrere chi nono a s’impiantu eòlicu pìgiu pìgiu chi diant pòdere cuncordare in su Mare de Sardigna.
Intra de issos ddoe fiant fintzas unos cantos ativistas chi pro una pariga de chidas aiant presidiadu su portu de Aristanis – Santa Justa. “Fiamus impignados meda in su portu, ma teneiamus disìgiu de fàghere carchi cosa contras de is impiantos offshore puru”, at naradu sa portaboghe de su Comitadu, Nicoletta Sanna. In custu addòbiu de S’Architu s’est chistionadu de su progetu de su parcu eòlicu offshore pìgiu pìgiu intra de Cabu Marràrgiu e Cabu Mannu, chi si diat bìere fintzas dae is costeras de Cùglieri, nòdidas pro sa presèntzia de s’archigheddu ammajadore.
“Amus ischidu chi sa protzedura dd’ant suspèndida”, at naradu Nicoletta Fadda. “Regordamus chi pro custu impiantu, a prus de s’impatu visivu, ddoe est fintzas cussu ambientale, pro ite ca ddoe sunt prevìdidos cavos sutamarinos collegados a sa terra firma e cabinas elètricas de mudadura”.
In Turre Manna puru, sàbadu passadu, ddoe ant fatu una manifestatzione particulare: s’assòtziu Liberanimos at fatu un’addòbiu a suta de sa turre cun unu duran adam, una chèscia a sa muda, abarrende istantàrgios. In sa manifestatzione is ativistas portaiant in manos palas eòlicas de cartòcia, istrichiddadas de sàmbene.
S’àteru apuntamentu est pro oe, 6 de austu: is ativistas de su presìdiu s’ant a bìere pro cuncordare àteras formas de chèscia in su tempus benidore. “Tocat a nos torrare a organizare, pro chi sa gherra contras de custas afracadas a su territòriu nostru sigat, totus impare”, ant iscritu in unu documentu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
