Novas Aristanesas, mèrcuris 21 de austu de su 2024
A pustis de Mesaustu, museos e logos archeològicos faghent su bilàntziu de is presèntzias – Logos archeològicos, museos, turres ispagnolas e nuraghes: sunt medas is logos culturales de sa provìntzia de Aristanis chi sunt abarrados abertos in is dies de vacàntzia in ocasione de is festas de Mesaustu, acasagende a dosinas de turistas chi arribaiant dae totu su mundu.
Is datos publicados dae is cooperativas e dae is àteros entes chi contivìgiant sa gestione de su patrimòniu istòricu-archeològicu de sa provìntzia de Aristanis mustrant una crèschida de su nùmeru de billetes bèndidos cunforma a su 2023.
A su putzu sagradu de Santa Cristina de Paulle ddoe sunt andadas 2.768 persones in is dies intra de su 14 e su 18 de austu, cun una crèschida de su 26% cunforma a ocannu passadu. In sa die de Mesaustu isceti sa billeteria at bèndidu 633 billetes.
Sutzessu mannu fintzas pro is logos de su Sinis gestidos dae sa Fundatzione Mont’’e Prama, chi su 15 de austu at bèndidu 1.808 billetes in totu, de custos 622 pro su Museu tzìvicu “Giovanni Marongiu”, 660 pro sa tzitade de Tharros, 436 pro sa Turre de Santu Giuanne, 68 pro s’ipogeu de Santu Sarvadore e 22 pro is iscavos de Mont’’e Prama. Dae su 12 a su 19 de austu, su Sinis at acasagiadu sa bellesa de 10.626 bisitadores chi ant pagadu su billete.
In su nuraghe Losa de Abbasanta, is billetes bèndidos dae mèrcuris a domìnigu sunt istados 788, cunforma a is 590 de su 2023. Sa die de Mesaustu su nuraghe dd’ant bisitadu 258 persones, mentras in su 2023 is bisitadores fiant istados 121.
Gente meda fintzas in is termas antigas de Fordongianus e in sa Domo aragonesa: si in su 2023 is presèntzias fiant istadas 120, ocannu dae su 14 a su 18 de austu ddoe sunt andadas 225 persones. Sa die de Mesaustu isceti si sunt contados unos sessanta billetes.
Nùmeros che a cuddos de ocannu passadu in Masuddas e in Pompu, in ue ddoe sunt su GeoMuseu e su Museu de is Cadderis de is montigros (in Masuddas) e su Museu multimediale “Domu de su pane” (in Pompu). In Pompu si sunt contadas 80 intradas, mentras in Masuddas sunt istados 200 is bisitadores chi ant chertu bìere is museos de sa bidda de Predi Antiogu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
