Novas Aristanesas, chenàbura 27 de cabudanni de su 2024
Serrat sa mustra de Samugheo – Ùrtimas dies ocannu pro bìere s’artesanadu artìsticu de Sardigna.
Si a un’ala in custas dies est giai tempus de bilàntziu pro sa de 63 editziones de sa Fiera de Mòguru chi at serradu su 22 de cabudanni passadu, cunfirmende, a ònnia modu, sos nùmeros mannos de sos annos passados, a s’àtera ala in Samugheo imbetzes ddoe at ancoras tempus pro bìere sos produtos in mustra in sa de 57 editziones de Tessìngiu.
Sa mustra, gràtzias a sa disponibilidade de sos artesanos, a s’agiudu de sa Regione Sarda e de s’Amministratzione comunale de Samugheo e de Orientare, cuncordada in su Museu Ùnicu Regionale de s’Arte Tèssile Sarda de Samugheo, at a abarrare aberta fintzas a custu domìnigu.
Tessìngiu at postu in mustra su patrimòniu artìsticu de s’ìsula, pro mesu de un’ espositzione chi at acapiadu a pare sos materiales, sos colores e s’iconografia, non solu intra traballos essidos a nou, resurtadu de sa chirca e de sas isperimentatziones cuntemporàneas, ma fintzas cun sas cosas de valore de sa colletzione istòrica de su museu.
Sos oràrios pro bìere sa mustra, fintzas a domìnigu ant a èssere a mangianu, dae sas 10.00 a sas 13.00, e a serigheddu, dae sas 16.00 a sas 20.00. Su billete pro intrare costat 6 èuros e paris a sa bisita a su Museu MURATS faghet a intrare fintzas a su CI.MA de Àllai. Sos pitzocheddos dae sos 13 a sos 18 annos e sas cambaradas de prus de 20 persones pagant 4 èuros. S’intrada est de badas pro sos pitzinnos fintzas a sos 12 annos e pro sos disàbiles.
Pro connòschere su bilàntziu definitivu de sa de 63 Fiera de Mòguru at a tocare a abetare ancoras unu paghitzeddu. Aberta su 26 de trìulas passadu, ddoe ant pigadu parte belle 107 artesanos. Sa cooperativa sotziale Mariposas de Sardinia si-nd’est incurada de su coordinamentu, de s’acasagiamentu e de promòvere sa mustra in su territòriu e in fines, pro custa editzione puru, a prus de su billete sìngulu ddoe fiat sa possibilidade de billetes pro bisitare sa fiera e àteros museos e logos de Parte Montis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
