Is apuntamentos in custa coa de chida in provìntzia de Aristanis – Custos sunt is apuntamentos prus de importu in custa coa de chida in provìntzia de Aristanis: chenàbura a merie, in Aristanis, aberit in su Museu diotzesanu “Regarder. Is aposentos de sa memòria”, mustra personale de La Fille Bertha e, a pustis, su cuntzertu de su MiniM Ensemble – Duo “No a s’amante suo”, formadu dae Lucio Garau cun s’òrganu e dae Emanuele Buzi cun sa viella, propostu dae s’Ente pro is Cuntzertos. Sàbadu, in sa ruga de Santa Maria, ddoe faghent sa Festa de Santa Rughe e su Memorial Enrico Fiori. Pro is amantiosos de su rock, in arborada de Repùblica, ddoe at a àere mùsica meda in su palcu de sa Contea. Sàbadu e domìnigu apuntamentu cun s’addòbiu regionale de su Vespa Club e, domìnigu a mangianu, cun sa gara tziclìstica pro su de IV memorial “Beppe Meloni” – XV Copa de Santa Rughe.
In Santu Lussurzu torrant a cumentzare is fainas de sa Fundatzione Hymnos dedicadas a is mùsicas de su connotu. Sàbadu a merie in Domo Donna Caterina, a intro de sa rassigna Hymnos Off, s’at a pòdere ascurtare su cantu a chiterra de su connotu logudoresu e gadduresu. In Crabas sàbadu e domìnigu ddoe ant a fàghere su Festival de sa Butàriga, cun unu muntone mannu de addòbios, òspites, laboratòrios, esperièntzias e tastaduras, chi si-nde at a pòdere bìere un’antitzipatzione chenàbura a merie in unu pre-fèstival in sa Cantina de is Continis.
In Mòguru chenàbura cumentzat “Nodas in Fiera”, unu biàgiu musicale in is logos de sa Fiera, fatu a manos de pare cun s’assòtziu Pedras e Sonus, mentras sàbadu a mangianu, pro su de duos annos, torrant a fàghere “Artes, Sonos e Sabores”: si cumentzat cun unu giru pro iscobèrrere su territòriu e cun sa bìsita a su nuraghe de Cucurada, pro acabbare a merie cun su primu apuntamentu de sa rassigna folk “Ballos sardos in pratza de is ballos”.
In Abas, sàbadu a merie, ddoe at a àere mùsica rock cun sa de 21 editziones de Rock X Gramsci, cuntzertu cuncordadu dae s’Assòtziu Domo anca est nàschidu Antoni Gramsci, mentras in Tzeddiani, semper sàbadu, torrat “Pulimus su Mundu”, sa faina cuncordada dae Legambiente.
In fines, in su Geomuseu Monte Arci “Stefano Incani” de Masuddas, sàbadu aberit sa mustra “Sardigna e Mundu, tempus passadu e tempus presente”, mentras sa die in antis in Curcuris, in dae in antis de sa crèsia de Santu Sebestianu, ddoe at a èssere sa presentada de su libru de Mauro Trogu e Beniamino Zuncheddu “Deo so innotzente”, cun atualidade giuditziària e mùsica, gràtzias a su Fèstival comunitàriu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
