Is apuntamentos in custa coa de chida in provìntzia de Aristanis – Sunt medas is addòbios in programma in custa ùrtima coa de chida in provìntzia de Aristanis.
In Aristanis sighit su “Cabudanni Aristanesu”, cun unu muntone de apuntamentos dae cras fintzas a domìnigu. Cumentzamus cun su Fèstival ConnEtica, chi si presentat cun duos addòbios de importu: su primu in programma in custa coa de chida, cumentzende dae oe e fintzas a domìnigu, intra de su Tzentru de Istùdios Dantza e is Lollas de su Cramu. Ancoras, su cuntzertu “Regordende a Beethoven” de su cuartetu de arcos “Is virtudosos de Santu Severu” chi cumentzat sa rassigna “Domìnigu in Cuntzertu” 2024 de s’Ente pro is Cuntzertos. S’apuntamentu est pro domìnigu a merie in su Museu Diotzesanu Arborensu. Dae oe e fintzas a domìnigu, in su Tzentru ìpicu de Santu Chìrigu, s’assòtziu “Giara aristanesa” cuncordat su de 15 Campionados italianos de ecuitatzione paralìmpica FISDIR. E sàbadu, imbetzes, su Tzentru cummertziale naturale “Tzentru tzitade de Aristanis” fùrriat is bighinados antigos de sa tzitade de Lionora a palestra a in logu abertu cun sa manifestatzione “Isport in su tzentru de sa tzitade”.
Nurachi, imbetzes, oferit un’addòbiu de importu: sàbadu a merie in sa corte de su museu intituladu a Pepetu Pau ddoe faghent “DiVini Sapori e àteros contos”, una chena a suta de is isteddos, unu bàntidu de is istànios e de is genias diferentes de binu prodùsidas in su territòriu. Su menù, ricu meda, ddu presentat su coghineri Alberto Sanna.
In Arborea cumentzat oe su Sardigna Endurance Fèstival 2024, chi s’at a fàghere in s’Horse Country Resort fintzas a domìnigu: in pista is mègius caddos e cadderis de Europa e de su mundu, cun is presèntzias de 138 atletas e de 153 caddos in rapresentàntzia de 29 natziones.
Sighit fintzas s’apuntamentu cun “Itàlia Romànica”, cun bìsitas ghiadas in àteras 17 crèsias romànicas de Sardigna. Intra de custas fintzas sa crèsia in pedra bia dedicada a Santu Lussurzu in Fordongianus, cun sa possibilidade de bisitare is tumbas antigas de is primos cristianos, e sa crèsia ispantosa de Santu Launàrgiu de Masuddas. In fines, in Crabas, domìnigu a mangianu ddoe torrant a fàghere sa Tziclopedalada de su Sinis. Is chi ddoe bolent pigare parte s’ant a pòdere iscrìere, cumentzende dae is oto de mangianu, in pratza de don Sturzo, dae ue at a mòvere sa cambarada de pedaladores.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
