Is addòbios de custa coa de chida in provìntzia de Aristanis – Custos sunt is addòbios prus de importu de custa coa de chida in provìntzia. Si cumentzat custu merie in su giardinu de su Museu Diotzesanu Arborense de Aristanis, cun su cuntzertu de su Duo Comè, formadu dae su clarinetista Davide Melis e dae sa pianista Benedetta Conte, chi ant a sonare in sa rassigna “Musica me in is meries de istade” chi s’Ente pro is Cuntzertos “Alba Pani Passino” at ordimingiadu.
Custu sàbadu, semper in su cabu-de-logu aristanesu, s’at a cumentzare a afestare a Nostra Sennora de su Remèdiu: is funtziones s’ant a fàghere a is 7, 8.30 e 11.30, mentras a is 4 de merie nche ant a èssere is vespros capitolares e a is 5 de merie sa missa. Sa missa de is 6 de merie, imbetzes, est intregada a is famìllias, mentras a is movimentos e a is cambaradas cristianas cudda de sas 7 de merie. S’incràs, nche at a èssere sa festa populare. Is funtziones ant a èssere ònnia ora: dae sas 5 de mangianu a is 5 de merie e, a is 6.30 de merie, sa cuntzelebratzione eucarìstica manna me in sa pratza de sa Basìlica. S’ùrtima missa at a èssere a is 9 oras de su note.
Dae sa fide a is traditziones e a is sainetes de unu tempus: sa Sagra de su Culurgioni de arrascotu chi, lòmpida a su de duos annos, bantat su culurgione de su logu de Marrùbiu. Sàbadu a merie, in bia de Piave, a fache de pratza de Amsìcora, is voluntàrios de sa Pro Loco ant a serbire sa chena. A pustis “Las Chicas Malas”, un’ispetàculu a incuru de sa Leva 99 de su Comitadu de Nostra Sennora de su Remèdu. Sa Pro Loco impare a s’Amministratzione comunale e a sa Leva 99 si sunt incurados de cuncordare sa Sagra pro festare a Nostra Sennora de su Remèdiu.
Imbetzes, me in is guturinos ispantosos de Sa Costa, in Bosa, sàbadu, afestant a Nostra Sennora de is Regnos Artos: pro custa ocasione, dae sas 8 de merie, su bighinadu dd’ant a ornare cun sa lughe artìstica de sa cambarada de is volontàrios DecoriAMO Bosa.
A coa totus a Aressa pro sa Sagra de sa Mèndula: sàbadu e domìniga prenus de addòbios, show de màndigu e anca s’at a pòdere tastare su papare cun sa Pro Loco; àteros addòbios comente a su motoradunu a incuru de su motuclub aressesu e mùsica a discansu.
Pro acabbare, in su Sinis, ddoe at a èssere “Netamus a s’Ìsula”, s’ùrtima die ecològica de s’annu chi domìniga a mangianu pertocat s’Ìsula de Malu Entu. Dd’ant cuncordada su Comune de Cabras e s’Àrea Marina Amparada.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
