Serbit unu pranu pro su dragàgiu de s’istàniu de Crabas e sa Regione si-nde depet fàghere càrrigu – Su sìndigu de Crabas Andrea Abis est istadu craru meda. In s’addòbiu cun is consigieris de sa de V Cummissiones de su Consìgiu regionale “Fainas produsidoras”, lòmpidos dae Casteddu pro fàghere unu subralogu, ddis at fatu una domanda sica: “Nde depimus essire dae s’idea de istraordinariedade e depimus torrare a s’idea de contivìgiu fitianu, ordinàriu”, at naradu su sìndigu, domandende unu pranu pro su dragàgiu de s’istàniu de Crabas. Segundu su sìndigu Abis sa Regione si depet fàghere càrrigu de custa faina. Custu diat permìtere de recuperare su pagu contivìgiu chi s’istàniu at tentu fintzas a immoe e diat fàghere torrare sa gestione de s’istàniu a unu regime giustu. Si contat chi tochet a nde bogare dae su fundale de s’istàniu e de is canales unos 150-200 mìgia metros cubos de ludu e àteros materiales, pro ddu torrare a abbiatzare.
Oe in die amegant de caminare is protzedimentos pro autorizare is progetos chi serbint pro pulire unos cantos tretos dae su ludu, pro unos 40 mìgia metros cubos de materiale in totu, chi impèigat sa cuncàmbia de s’abba de s’istàniu cun cussa de su mare abertu.
Su sìndigu at naradu chi, a pustis fata sa faina de bonìfica, ant a pònnere cambas a un’interventu pro torrare a fraigare sa pischera de Pontis comente fiat in tempus antigu, cun canna e linna, gràtzias a unu finantziamentu de 475 mìgia èuros postos dae sa Programmatzione Territoriale.
In fines, Andrea Abis at faeddadu de su bisòngiu de un’àteru interventu pro acabbare is fainas de dragàgiu. A custa domanda, si-ddoe agiunghet fintzas cussa pro su finantziamentu de su contivìgiu istraordinàriu de un’àtera pischera, cussa de tzimentu de Sa Màrdini, de importu mannu pro sa gestione econòmica de is cooperativas de su Cunsòrtziu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
