Is voluntàrios ant a pulire su Sinis – Una domìniga intregada a su respetu e a s’amparu de s’ambiente. Domìniga chi benit, s’8 de su mese de cabudanni, cun sa faina “Netamus a s’Ìsula”, torrant is dies ecològicas de Sinis 2024, chi su Comune de Cabras at postu a cùrrere impare a s’Àrea Marina Amparada de Sinis.
Chie at a pigare parte a sa faina at a tènnere sa possibilidade de nche passare una die pro s’amparu de s’ambiente gràtzias a su voluntariadu, custu ùrtimu de importu mannu pro torrare sos logos a s’innidesa issoro a s’acabbu de sas istajones, assegurende aici chi sa costera de s’isula de Malu Entu alloghet s’ermosura sua.
Pro pigare parte a sa die de netesa de s’ìsula de Malu Entu tocat a si marcare e compilare su form de inoghe. Faghet a si marcare finas a su 5 de su mese de cabudanni, a is oras 2 de a pustis pràngiu. A is chi s’ant a marcare ddos ant a tzerriare cuddos de s’organizatzione e ant a retzire is informos pro si transire fache a Malu Entu pro mèdiu de sas barcas. Pigare parte a custa faina est a gratis e ddoe at a disponimentu 120 postos.
Is dies ecològicas sunt cumentzadas su 23 de martzu: pro sa prima borta s’est andadu a pratza de Istàniu e metallos, polistirolu, bestimenda betza, cobertones e plàstica de tragare a marra ant prenu is bustas de is volontàrios.
A coa s’est sighidu in su mese de abrile me in is prajas de Maimoni e de s’Archeddu ‘e sa canna e in su mese de maju in cuddas de Corrighias e de Is Arutas: is voluntàrios nd’ant boddidu prus o mancu 800 kg de àliga, sena de pigare in consideru is carramatzinas recuperadas e transidas fache a su tzentru de ismaltimentu.
“Est una faina de tzivilidade chi gherrat contras a sa manera indigna de chie sighit a tratare male s’ambiente. Totus nois si depimus impignare non petzi pro poderare netu su logu anca bivimus, ma cuddu chi bisitamus puru”, at naradu s’assessore de s’ambiente Carlo Carta.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
