Sas bìnchidas de sos isportivos de sa provìntzia de Aristanis – Dae su mundu de s’isport, ancora àteras bìnchidas pro sos giòvanos de sa provìntzia de Aristanis.
Gasi est pro Francesco Murru, 14 annos, de Arriora, chi at a andare a giogare a sas giovaniles de su Casteddu e s’at a pònnere sa malliedda ruja e biaita de sos Under15. Su tzentru-campista nàschidu in Arriora in su 2010, at giogadu in s’U.S. Othoca Cappuccini Asd, pesadu cun su primu allenadore Roberto Orrù e su segundu Elio Matteoli. Murru pro cantu atenet a sa tècnica est nàschidu in s’iscola de càlcio de s’Othoca chi dae prus de 20 annos nd’at bogadu a pìgiu giogadores meda in s’iscola de càlcio.
Dae sa pròpia iscola, fintzas àteras tres giòvanas promissas de su fùbalu feminile s’ant a pònnere sa malliedda ruja e biaita. Sunt Denise Sanna, Aurora Demartis e Serena Cocco totas tres de su 2009, ant a giogare in s’Under 15 feminile de su Casteddu. Denise est una punta de mesu originària de Aristanis; Aurora, Bonarcadesa, est un’esterna de mesu de campu e Serena imbetzes, de Bòrore, est una tzentrale de defensa. In su campionadu passadu ant giogadu totas tres in sa categoria provintziale Giovanissimi de s’Othoca.
Dae su fùbalu nche andamus a su wingfoil. In antis sa finale de Copa Itàlia e su Campionadu regionale de wingfoil in Turre Manna, a pustis sa tapa sarda de su Mundiale, in Casteddu. Est gasi chi, in atòngiu, Nicolò e Maddalena Spanu, frade e sorre, ant a “giogare in domo”.
Custas chidas passadas Maddalena at bìnchidu su de duos postos in sa tapa mundiale in Tzina, in s’ìsula de Pingtan. In su de sete postos in sa classìfica maschile, imbetzes, su frade, Nicolò, chi in Asia est arribadu su de sete intra de 90 atletas in gara. Su mannu de sos frades Spanu est tesseradu cun Windsurfing Club Cagliari.
E ancora atlètica lèbia, cun su campione olìmpicu de Aristanis, Lorenzo Patta, chi est arribadu in su de ses postos in sos 100 metros in 10” e 31 in su Pàliu “Città della quercia” de Rovereto, in Trentinu.
Martis passadu su velotzista de sas Pampas Grogas e de s’Atlètica de Aristanis at torradu a cùrrere, unu mese a pustis de sas Olimpìades de Parigi. Su Pàliu Città della Quercia est s’addòbiu prus antigu de s’atlètica lèbia italiana e uno de sos prus antigos de su mundu. Sa manifestatzione faghet parte de su tzircuitu World Athletics Continental Tour Silver.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
