Su primu mese de sa Fiera de Mòguru – Mancant prus o mancu 20 dies a sa serrada de sa Fiera de s’Artesania artìstica de Sardigna de Mòguru e si podent bogare a pìgiu is primos resurtados: dd’ant aberta su 27 de trèulas e, in su primu mese, dd’ant bida prus o mancu 7000 pessones, prus de is bisitadores de ocannu passadu.
Duncas una cunfirma de is nùmeros de is editziones de is annos passados: in su primu mese sa Fiera at giai contadu un’intrada de 153.000 èuros, dinari fatu pro mèdiu de is traballos manuales bèndidos e prus pagu de 20.000 èuros guadangiados petzi dae is billetes simpres.
Ocannu ddoe sunt 106 esponidores, cun artesanos chi faghent parte de 13 setores artìsticos: dae sos aratzos a sos tapetes tèssidos a manu, sena de ismentigare sas tzeràmicas, s’arredamentu, is bussas e is fatzolas de pedde de su logu, ma sena ismentigare mancu is siendas de primore de s’agrualimentare.
Is billetes chi si podent comporare sunt de duas genias: unu billete pro imbucare a sa Fiera e bastat, un’àteru imbetzes chi permitit de imbucare non petzi a sa Fiera, ma a giassos e museos de Parte Montis. In trinta dies ant bèndidu 478 billetes: 260 pro su nuraghe de Cucurada, 66 pro su Museu multimediale Turcus e Morus, 96 pro su Geomuseu de Monte Arci e 56 pro su Museu de su Pane de Pompu.
Presu mannu su de su Comunu de Mòguru, su chi at fatu mòvere totu: “Ònnia annu faghimus unu passu a in antis”, at naradu s’assessore comunale de is Fainas produsidoras, Francesco Serrenti, “non petzi pro su chi pertocat sos nùmeros, chi, est craru, si donant presu, mancari sient partziales, e nos ispuntzonant a sighire fache a su chi amus detzìdidu. Comente a organizatzione, a Amministratzione comunale e a Comunidade moguresa semus crèschidos unu addòbiu a pustis de s’àteru: s’impignu, castiende-ddu a 360 grados, no est de pagu contu, ma como sa màchina est rodada e totus, cumentzende dae is pitzinnos de s’acasagiamentu, nche ponent atza e professionalidade in su fitianu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
